Komisáriu Adjuntu CAC ba asuntu Prevensaun no Sensibilizasaun, Luis de Oliveira Sampaio. Imajen Tatoli/Jogerjo Guterres

DILI, 03 dezembru 2020 (TATOLI)-Komisaun  Anti-Korrupsaun (CAC)  iha difikuldade  ho dadus espesífiku ba benefisiáriu ne’ebé ho  saláriu liu $501 ne’ebé simu ona subsídiu agregadu familiar  $200 hosi Governu.

Notísia Relevante : CAC aprezenta relatóriu deskobrimentu implementasaun fundu agregadu família ba MAE

Komisáriu Adjuntu  ba Prevensaun no Sensibilizasaun CAC, Luis Oliveira Sampaio, hateten, ho difikuldade ne’e sira-nia parte seidauk bele halo asaun represivu ka investigasaun  tuir lei  ba  ema-sira  ne’ebé lakohi koopera hodi entrega fila-fali osan ne’ebé sira simu ona.

Nia hatutan, problema ne’e Ministériu Solidariedade Sosiál no Inkluzaun (MSSI) rasik seidauk iha dadus espesífiku tanba ne’e  sei  halo koordenasaun ho MSSI, Ministériu Administrasaun Estatál (MAE) hodi bele identifika dadus espesífiku ba  kada ema.

“Ami iha difikuldade atu identifika funsionáriu ne’ebé simu ona subsídiu ne’e tanba la iha dadus ketak ba funsionáriu sira, maibé ami buka tuir nafatin se iha dadus kompletu sei prosesa hodi halo investigasaun,” Luis Oliveira Sampaio hateten hodi responde Agência Tatoli, ohin, iha Dili.

Antes ne’e, liuhosi rezultadu monitorizasaun  no akompañamentu ekipa konjunta hosi CAC, Provedoria Direitu Umanu no Justisa (PDHJ), Inspetór Jerál Estadu (IGE) no Komisaun Funsaun Públika (CFP) iha ámbitu  ezekusaun subsídiu agregadu familiár  iha territóriu nasionál la konsege trava hodi   deskobre katak benefisiáriu na’in-148  ho totál osan $29,600,00, ne’ebé simu ona subsídiu agregadu familiár hosi Governu la prienxe rekizitu tuir dekretu lei apoiu monetáriu ba agregadu familiar.

Hosi númeru ne’e tuir lista hosi MSSI  daudaun ne’e foin mak ema na’in-18 ho voluntáriu konsege entrega  hikas  $3,600,00 ba Governu no barak mak seidauk entrega.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here