Xefe Bankada CNRT, Duarte Nunes. Imajen/Egas Cristovão

DILI, 03 dezembru 2020 (TATOLI)—Bankada Congresso Nacional da Reconstrução de Timorense (CNRT), espera lei protesaun sivíl ne’ebé Prezidente Repúiblika Francisco Guterres ”Lú Olo” promulga ona bele substitui ona estensaun Estadu Emerjénsia.

”Ha’u espera katak estensaun ida-ne’e ba dala-ikus tanba ita iha ona instrumentu (lei protesaun sivíl), nune’e la presiza halo tán estensaun ba estadu emerjénsia,” Xefe Bankada CNRT, Deputadu Duarte Nunes, informa liuhosi plenária estraordinária ba estensaun Estadu Emerjénsia daualu (8), kinta ne’e.

Nune’e mós Deputada Bankada CNRT, Deputada Carmelita Caetano Monis, apresia Prezidente Repúblika ne’ebé promulga ona lei protesaun sivíl no bele uza hodi responde pandemia COVID-19.

“Lei ida-ne’e mak ita bele uza hodi responde ba pandemia COVID-19. Lei ne’e hatete iha situasaun tolu hanesan situasaun alerta, situasaun kontijénsia no situasaun kalamidade. Ne’e dalan ida atu Primeiru Ministru kada fulan la presiza mai Parlamentu Nasionál hodi husu estensaun deklarasaun estadu emerjénsia,“ Deputada bankada opozisaun ne’e hateten.

Tanba, tuir nia, estensaun deklarasaun Estadu Emerjénsia liuhosi burokrasia ne’ebé naruk tebes maibé liuhosi lei protesaun sivíl bele hamosu medida rigorozu hosi Governu.

Jornalista: Evaristo Soares Martins

Editór: Cancio ximenes

HAKEREK NO HATÁN

Please enter your comment!
Please enter your name here