Ministru Edukasaun Juventude no Desportu, Armindo Maia.Imajen/Antonio Goncalves

DILI, 03 dezembru 2020 (TATOLI)—Ministru Edukasaun Juventude no Desportu (MEJD), Armindo Maia, hateten liuhosi edukasaun mak bele halo mudansa ba mundu, tanba ne’e edukasaun ne’ebé diak tenke hahú hosi uma laran (família).

“Ko’alia edukasaun la’ós iha eskola de’it, maibé hahú hosi uma-laran. Katak, inan-aman mak hahú sai manorin ba oan sira, hafoin ba eskola, sosiedade, Igreja no komunidade,” Armindo Maia hato’o iha nia diskursu iha iha konferénsia nasionál ne’ebé realiza hosi MEJD ho parseiru dezenvolvimentu umanu (PHD-sigla inglés) ho tema “Feto iha Edukasaun” ne’ebé hala’o iha Salaun Delta Nova, Dili, foin lalais ne’e.

Nia esplika, objetivu hosi hili tema iha konferénsia ne’e atu haforsa lideransa feto no oinsá presiza hamate violénsia hasoru feto iha eskola, uma no iha sosiedade tomak.

“Promove partisipasaun feto iha prosesu dezenvolvimentu ita-nian, tanba dala-ruma ita hanoin katak ita-nia sosiedade tradisionál, feto sira tenke iha dapur no iha uma de’it. Maibé, mundu ohin loron mudansa ona, feto sira mós bele kaer ukun, ne’e hatudu mudansa mentalidade ba ita-nia bei’ala sira-nia tempu dehan feto tenke  iha dapur. Maibé papél edukasaun importante tebes iha tempu ohin loron nian, tanba liuhosi edukasaun mak bele ajuda mundu,” Armindo Maia hateten.

Nia hateten, baibain ko’alia kona-ba lideransa feto, ema hotu hanoin de’it kona-ba inan-feton sira ne’ebé asume kargu ruma maibé lideransa ne’e iha ona inan-feto ida-idak nia-aan rasik.

“Tanba ne’e atu sai lider, hahú hosi ita, mak sai líder ba ita-nia aan rasik, no ita-nia inan-feto mak lider dahuluk ba nia oan sira,” MEJD hateten.

Lider másimu MEJD ne’e iha esperansa katak, liuhosi konferénsia ida-ne’e sei habelar liután kona-ba oinsá atu dezenvolve poténsia lideransa iha inan feton sira, liuliu dezenvolvimetu profisionál ba maneira hanorin profesór sira.

Aleinde dezenvolvimentu profisionál, nia hatutan, importante maka oinsá feto poténsia sira bele hala’o sira-nia knaar nu’udár lidér profisionál ezemplár iha eskola no sai  mós lidér edukasionál.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here