DILI, 03 dezembru 2020 (TATOLI)-Alunu hosi turma 5◦ Kursu Promosaun Ofisiál Superiór (CPOS) kompostu hosi membru F-FDTL no PNTL hala’o vizita servisu hodi rekolla direita problema-sira ne’ebé forsa konjunta UPF, F-FDTL no PNTL enfrenta durante asegura seguransa iha liña fronteira Munisípiu Covalima nian.
Notísia Relevante : Alunu CPOS na’in-28 remata pratika iha Bobonaro
Diretór Ensinu Formasaun Institutu Defeza Nasionál Timor-Leste (IDN-TL), Tenente Koronél Benedito Diaz Quintas “Punu Fanu” dehan, vizita servisu ne’e importante tebes atu alunu sira bele rekolla dadus no problema ne’ebé forsa-sira enfrenta hodi hato’o ba superiór-sira iha PNTL no F-FDTL no governu buka solusaun.
Nia dehan, vizita ne’e estudante-sira aproveita rekolla mós dadus iha área tátika no administrasaun hodi kontribui ba sira-nia traballu investigasaun indivíduu no monografia.
“Ha’u nia konkluzaun durante vizita estudu konfirmasaun iha terrenu ne’e, observa 5◦ CPOS entuziazmu tebes iha hato’o pergunta ba komandante postu polísia ho F-FDTL sira, kolokadu iha fronteira, hein dadus-sira halibur natoon hodi fomenta sira-nia traballu individuál ho monografia,” dehan Tenente Koronél Punu Fanu, liuhosi komunikadu imprensa hosi IDN-TL ne’ebé Agência Tatoli asesu, ohin.
Vizita estudu hosi alunu 5◦ CPOS na’in 28 ne’e, mai hosi Kapitaun F-FDTL na’in 20 no Inspetór Xefe hosi PNTL na’in-ualu (8).
Alunu-sira durante ne’e hetan ona formasaun kona-ba planeamentu konduta Ezersísiu, Operasaun Konjunta no Kombinadas, Planeamentu Operasaun, Operasaun Apoiu ba Paz iha Bloku Estratéjia nian.
Matéria seluk tan kona-ba Sistema Internasionál no konflitualidade, Jeopolítika, Estratéjia no Planeamentu Estratéjiku, Estratéjia Nasionál, Istória Militár Universál, Istória Militár Timor-Leste, Konferensia kona-ba Organizasaun Internasionál.
IDN-TL lori estudante sira ne’e ba hala’o pratika iha terrenu ho objetivu hodi lori sira bele hatene kle’an kona-ba problema báziku ne’ebé forsa konjunta-sira enfrenta iha área remotas bele kontribui halo planeamentu ba operasaun no apoiu halo traballu investigasaun santifika no kontribui ba desizaun ne’ebé sira bele halo iha asaun futuru nian.
Jornalista: Eugénio Pereira
Editór: Francisco Simões
