Produtu Cesta Bázika iha bote Imajen TATOLI/Antónia Gusmão

DILI, 02 dezembru 2020 (TATOLI)—Xefe Suku Caicoli Postu Administrativa Vera-crus Munisípiu Dili, Hipólito Marques Ximenes, sujere ba Governu katak programa Cesta Bázika ne’e fahe ba ema kbiit laek sira no ema ne’ebé la servisu inklui ba ema sira-ne’ebé hela iha kapitál.

Notisia Relevante: PM Taur:  “programa Cesta Bázika’ todan, presiza ema hotu apoiu”

“Ha’u sujere de’it ba Governu katak programa Cesta Bzika ne’e fahe ba ema ne’ebé mak laiha kbiit no la servisu inklui ba sira-ne’ebé mak hela iha kapitál, tanba iha kapitál ne’e susar ba ai-han tanba laiha natar no toos,” Xefe Suku Caicoli, Hipólito Marques Ximenes, dehan ba Agência TATOLI iha nia knaar fatin, Caicoli, Dili, kuarta ne’e.

Hipólito Marques Ximenes hateten, atu di’akliu Governu fahe ai-han ba komunidade iha kapitál no fahe osan ba komunidade kbiit laek sira-ne’ebé mak hela iha foho, nune’e labele fó benefísiu fali ba ema balun de’it.

Maske nune’e, xefe suku ne’e la satisfas no la aseita ho programa Cesta bázika ne’e tanba menu ka item ai-han fahe la hanesan ba komunidade sira iha territóriu Timor-Leste.

“Ha’u la aseita no ha’u krítika programa Cesta Bázika ne’ebé mak ita-nia Governu planea hodi distribui ai-han ba povu, maibé menu ba ai-han la hanesan. Kada ema sei hetan ai-han hodi sur aba osan $25 maibé realidade ne’ebé mak iha la to’o tanba Governu gasta fali ba transporte, kompañia inklui ba ema ne’ebé mka hatuun no hasa’e sasán iha kareta laran,” nia dehan.

Tanba, tuir nia, suku balun iha munisípiu hetan ai-han di’ak no balun menus, nune’e atu di’ak liu fahe osan duké fahe ai-han ba komunidade sira maibé ninia benefísiu ne’e ba ema balun de’it.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here