Primeiru-Ministru, Taur Matan Ruak, hamutuk ho membru Governu sira defende Proposta OJE 2021 iha debate faze jeneralidade, iha sala plenária. Imajen TATOLI/Egas Cristovão

DILI, 02 novembru 2020 (TATOLI)–Primeiru Ministru (PM), Taur Matan Ruak, apresia deputadu sira tanba partisipa másimu no ativu iha diskusaun proposta Orsamentu Jerál Estadu (OJE) 2021 iha faze jeneralidade.

Parlamentu Nasionál (PN) aprova proposta orsamentu iha jeneralidade ho rezultadu votasaun a-favór 44, kontra 0 no abstensaun 0, enkuantu Bankada CNRT deside la partisipa votasaun.

“Ha’u apresia esforsu deputadu Parlamentu Nasionál hodi debate ho di’ak proposta orsamentu tinan fiskál 2021 iha faze jenerealidade. Ha’u lori VIII Governu nia naran, agradese ho laran tomak tanba deputadu sira konsege hariku ita-nia diskusaun durante loron tolu ne’e,” PM Taur hateten iha ámbitu debate loron datoluk proposta OJE 2021 iha faze jeneralidade, iha sala plenária PN, kuarta ne’e.

Notísia Relevante: PN aprova proposta OJE 2021 iha jeneralidade

Xefe Governu konsidera, Orsamentu Estadu importante tebes atu ajuda Timor-Leste sai hosi resesaun no dudu kreximentu ekonómiku hodi fó servisu no redimentu ba família inklui fó bem estar ba sidadaun.

PM hatutan, Governu kontinua kompromitidu hodi hariku liután diskusaun iha faze espesialidade OJE 2021 hodi hetan aporvasaun hosi uma fukun ida-ne’e, nune’e bele dezenvolve nasaun.

Diskusaun orsamentu iha faze jeneralidade realiza durante loron tolu, hahú iha loron 30 novembru to’o 02 dezembru, no tuir oráriu iha loron 4 dezembru 2020 sei kontinua halo diskusaun iha faze espesialidade no finál globál.

Jornalista: Florêncio Miranda Ximenes  

Editora: Julia Chatarina

HAKEREK NO HATÁN

Please enter your comment!
Please enter your name here