Dansa kulturál iha seremónia enserra formasaun no lansa kontratu probatóriu faze 3, iha suku Caenlio, kuarta (23/09). Imajen/UE

DILI, 02 dezembru 2020 (TATOLI)—Sekretáriu Estadu Arte no Kultura (SEAK) deside ona sei komemora loron nasionál kultura ne’ebé monu iha loron 7 to’o 8 fulan-dezembru 2020 iha Munisípiu Lautem.

“Ha’u promote tiha ona iha tinan kotuk katak tinan ne’e ita tenke komemora loron nasionál kultura ne’e iha Munisípiu Lautem ho intensaun hakarak hakbesik Governu ba komunidade no komunidade rasik tenke sai na’in ba kultura,” Sekretáriu Estadu Arte no Kultura Teofilho Caldas, informa asuntu ne’e ba jornalista sira iha Matadouro kuarta ne’e.

Notísia Relevante :14 outubru, SEAK mantein realiza festivál kulturál iha Lospalos

SEAK prevee orsamentu hamutuk rihun $25 ba eventu kulturál ne’e. Serimonia ne’e rasik sei la’o iha ritmu kulturál nian, tanba ne’e, Sekretáriu Estadu ne’e koordena ona ho Sangar Timor Furak atu partisipa iha eventu ne’e.

“Ita husu ona ba sira (Sangar Timor Furak) atu la’o hamutuk ho ekipa SEAK nian hodi hamutuk organiza eventu ne’e ho responsavel másimu sira iha Munisípiu Lautem atu bele garante progresu husi eventu ne’e rasik,” tenik tan.

Nune’e Diretór Jeral SEAK, Manuel Smith, informa ekipa tékniku daudaun ne’e halo ona koordenasaun ho Autoridade Munisípiu Lautem hodi realiza eventu ne’e iha semana oin.

Entretantu, tuir planu iha tinan 2021, Governu sei komemora loron nasionál kultura ne’e iha Munisípiu Bobonaro tanba haree ba jeografikamente komunidade sira iha Munisípiu ne’eba besik liu ho nasaun viziñu Indonézia.

Notísia Relevante :SEAK prevee osan rihun $40-resin halo peskiza ba uma lisan

Jornalista : Tomé Amado  

Editór :Agapito dos Santos

HAKEREK NO HATÁN

Please enter your comment!
Please enter your name here