DILI, 02 dezembru 2020 (TATOLI)- Komandu Polísia Nasionál Timor-Leste (PNTL) Munisípiu Dili detein joven mane ida ho inisiál MA ne’ebé hala’o atividade fa’an fogete ilegál.
Notísia Relevante : UPF halo apreensaun ba mina-rai, sigarru ilísitu no fogete
PNTL detein MA iha ninia rezidénsia Suku Bairru-Pite, Postu Administrativu Don Aleixo, Munisípiu Dili, segunda lokraik (01/12).
“PNTL halo operasaun koordena ho membru Konsellu Polisiamentu Komunitáriu (KPK) no autoridade lokál-sira inklui kolega balun hosi forsa ne’ebé sempre fó informasaun ba autoridade Polísia, entaun konsege deteta no kaptura suspeitu ida ho inisiál MA ne’ebé fa’an fogete ilegálmente iha ninia rezidénsia Bairru-Pité, Dili,” Segundu komandante PNTL Munisípiu Dili, Superintendente Euclides Belo dehan, ohin, iha Dili.
Superintendente Euclides hatutan, MA sei detein iha sela detensaun polísia Dili hodi kumpre oras 72 no sei aprezenta kazu ne’e ba Ministériu Públiku hodi prepara primeiru interrogatóriu ba tribunál.
Iha operasaun ne’e, PNTL halo mós apreensaun ba fogete kaixa ida ne’ebé suspeitu deklara sosa hosi ninia kolega negosiante ne’ebé fa’an iha sidade Dili.
Relasiona ho kazu ne’e, Komandu PNTL Dili alerta ba negosiante no empreza sira bainhira fa’an fogete tenke hetan karta rekoñesimentu hosi Governu Timor-Leste.
Jornalista : Eugénio Pereira
Editór : Francisco Simões
