Vise Prezidente Parlamentu Nasionál, Maria Angelina Sarmento. Foto Egas Cristóvão

DILI, 02 dezembru 2020 (TATOLI)—Partidu Libertasaun Popular (PLP) ne’ebé garante VIII Governu iha Parlamentu rekomenda ba Governu atu promove poupansa polítika no kria estabilidade polítika nune’e bele hetan rendimentu iha tinan 10 oin mai.

“Ha’u hakarak hato’o rekomendasaun modesta katak presiza kria estabilidade polítika hodi nune’e Timor-Leste bele luta konsertada ida hodi halo Timor-Leste sai país ida ho rendimentu altu-médiu iha 2030 no presiza promove polítika poupansa iha gastu hosi fundu petrolíferu ne’ebé limitadu hodi nune’e bele garante sustentabilidade hosi país ida-ne’e,” Deputada Bankada PLP, Maria Angelina Lopes Sarmento, levanta liuhosi debate jeneralidade loron daruak ba OJE 2021, iha plenária PN, kuarta ne’e.

Deputada Maria Angelina parabeniza VIII Governu Konstitusionál ne’ebé lidera hosi Primeiru Ministru Taur Matan Ruak tanba aprezenta ona OJE ba tinan 2021 iha momentu ida-ne’ebé defísil iha COVID-19 no dinámika polítika iha rai laran.

Deputada Bankada PLP ne’e konsidera aprezentasaun  proposta OJE 2021 ne’e manifesta kompromisu polítika no firmeza hodi kontinua luta atu lori Timor-Leste  ba moris di’ak.

“Instabilidade polítika iha rai Timor-Leste, hanesan divórsiu polítika iha AMP  iha tinan 2019 nia rohan, posívelmente halo polítika sira dúvida ba sira-nia vokasaun polítika atu luta ba objetivu komún no moris di’ak nian. Maibé hanesan Primeiru Ministru Taur Matan Ruak bainbain dehan, laiha kadiadu ida mak laiha xave, laiha problema ida mak laiha solusaun. Apezárde dezafiu oinoin ne’ebé ita hasoru, Timor-Leste tenke la’o bá-oin nafatin,” Deputada Bankada PLP hateten.

Nune’e formasaun Governu iha meadu 2020 sai hanesan solusaun ida ba instabilidade polítika iha rai laran, ho ninian reperkusaun oinoin, inklui OJE 2020 ne’ebé Parlamentu Nasionál xumba, hodi konsekuentimente obriga nasaun ne’e moris hakdasak ho rejime duodesimál.

“Panorama Orsamentál 2021, partikularmente livru 1, haktuir katak ho Timor-Leste nia levantamentu hosi fundu petrolíferu sempre exede RSE (Rendimentu Sustentável Estimadu) iha tinan 12 nia laran koloka Timor-Leste iha risku ida. Osan hosi fundu petrolíferu sei esgotu iha tinan 10 ka 13 nia laran,” Vise PPN ne’e hateten.

Deputada Maria Angelina dehan Timor-Leste presiza tebes hasa’e reseita doméstika no diversifika ekonomia hodi nune’e labele depende maka’as ba mina no gás.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here