Primeiru-Ministru, Taur Matan Ruak, hamutuk ho membru Governu sira defende Proposta OJE 2021 iha debate faze jeneralidade iha sala plenária. Imajen TATOLI/Egas Cristovão

DILI, 02 dezembru 2020 (TATOLI)—Ministru Finansa, Rui Gomes, konsidera atu halo rekuperasaun ekonómika, Estadu presiza politíka fiskál tanba úniku investimentu mak konsumu no output nasionál sa’e hodi fó valór pozitivu ba redimentu.

“Proposta Orsamentu Jerál Estadu (OJE) 2021 ho montante biliaun $1,8 resin, hosi prespetiva polítika fiskál, montante la’ós problema maibé importante maka alokasaun ba programa sira ho ezekusaun ne’ebé kualidade,” Ministru Finansa afirma iha ámbitu debate loron datoluk OJE 2021 iha faze jeneralidade, iha sala plenária, Parlamentu Nasionál (PN), kuarta ne’e.

Prezidente Komisaun ba Planu Rekuperasaun Ekonómika ne’e dehan, implemnetasaun Rekuperasaun Ekonómika hahú 2020 ba oin ho objetivu atu sustenta ekonomia no defende bem estar populasaun sira inklui transforma fundamentu ekonomia no sosiedade.

Tuir governante ne’e, Proposta OJE 2021 mai ho objetivu atu buka inverte tendénsia negativa sira iha problema estruturál, liuliu dependensia ba finansiamentu fundu petrolíferu.

“Orsamentu ida-ne’e, ita hein katak Timor-Leste bele retoma filafali taxa kresimentu iha 2021 no espera katak ajuda taxa kresimentu tinan 2022 no 2023  ba oin,” nia afirma.

Ministru nota katak Timor-Leste hanesan país ne’ebé sei iha prosesu dezenvolvimentu ho problema estuturál lubuk ida tanba ekonomia sei dependente liu atividade Estadu.

“Maski ita rejista ona progresu balun, hahú hosi restaurasaun independénsia to’o agora, maibé sei iha problema esturuturál sira ne’ebé nota, maski ita-nia ekonómiku sei dependente ba aktividade Estadu ho finasiamentu hosi fundu petrolíferu,” nia akresenta.

Ekonomista ne’e observa, durante ne’e Governu seidauk hasa’e investimentu produtivu no setór privadu sei fraku tebes no hetan apoia kiik tebes hosi Estadu.

“Ita-nia mão de obra barak mak seidauk iha nível iha rejiaun Ázia, setór informál iha setór pezu iha Produtu Internu Brutu (PIB) mós a’as tebes no dezempregu joven mós a’as,” nia hatutan.

Tanba ne’e, kombinasaun faktór estuturál sira ne’e halo Timor-Leste hetan redimentu kiik no nível pobreza a’as, ne’ebé aspetu esturuturál labele rezolve iha tinan ida ka rua.

Alende ne’e,  Governu rekoñese sistema saúde no edukasaun presiza tebes atu halo melloramentu signifikativa, sistema seguransa sosiál ne’ebé sei nurak tebes no presiza tempu atu fó kobertura ba sidadaun sira.

“Ita hotu hatene katak situasaun moris iha Dili ka kapitál la hanesan ho situasaun moris iha área rurál tanba ema barak tebes mak moris hosi agrikultura sustensiál no balun hetan difikuldade ba asesu bens esensiál,” katak nia.

Iha fulan-marsu 2021 Timor-Leste hetan soke boot ida husi pandemia COVID-19 ne’ebé fó impkatu ba ekonomia no sosiedade nia moris.

“Iha situasaun krize hanesan ne’e sidadaun ne’ebé moris ho difikuldade ka vunerável mak hetan terus liu tanba laiha kondisaun no kapasidade atu satan xoke sira ne’e, Estadu nia dever atu proteje sidadaun,” realsa.

Membru ezekutivu ne’e dehan, bainhira iha noasaun klaru kona-ba problema estruturál país, hanesan pasu importante atubele dezeña medida sira atu bele ajuda hodi fó sosulasaun.

“Pandemia COVID-19 la’ós kauza prinsipál ba problema estruturál sira ne’e, maibé COVID-19 mai aumenta problema estruturál ne’e,” nia fó hanoin.

Dotasaun Orsamentál Temporáriu (DOT) durante fulan sia nia laran la fó marjen ba Governu atu halo metigasaun ba impaktu negativu ne’ebé mosu hosi pandemia globál no fó kbiit atu proteje sidadaun sira ne’ebé presiza tulun.

Tanba ne’e, OJE 2020 ne’ebé aprova iha PN no Prezidente Repúblika promulga ona hanesan insturumentu polítika ida atu salva país hasoru krize ekonomia.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here