Konfederasaun Sindikatu Timor-Leste (KSTL) halo ona lansamentu ba programa Spotlight ho tema “Labele Tauk Atu Ko’alia Sai”. Imajen TATOLI/Osória Marques.

DILI, 02 dezembru 2020 (TATOLI)—Konfederasaun Sindikatu Timor-Leste (KSTL) halo ona lansamentu ba programa Spotlight ho tema “Labele Tauk Atu Ko’alia Sai” ne’ebé tuir planu iha fulan ida-ne’e sei halo sensibilizasaun no kampaña ativizmu iha munisípiu tolu.

Vise prezidente KSTL, António da Costa Martins esplika, liuhosi programa Spotlight mak bele elimina violénisa hasoru feto no labarik feto iha Timor-Leste (TL), nune’e KSTL hamutuk ho traballadór sira sei halo sensibilizasaun no implementa iha munisípiu tolu mak hanesan Baucau, Ermera no Bobonaro.

“Ohin ita halo lansamentu no semana tuir mai ita sei halo sensibilizasaun ba munisípiu Baucau, Ermera no Bobonaro,” António da Costa Martins hateten ba Agência TATOLI iha lansamentu Programa Spotlight, iha edifísiu KSTL Bemori, Dili, Kuarta ne’e.

António da Costa Martins esplika, objetivu hosi programa Spotlight ne’e atu prevene no hapara violénsia ho asédiu iha fatin serbisu no promove konvensaun International Labour Organisation (ILO) 190 kona-ba halakon violénsia no asédiu iha mundu traballu.

Nia hatutan, alvu ba programa Spotlight tinan ne’e, KSTL hamutuk ho parseiru sira hili munisípiu tolu ne’e, tanba dadus estatístika hatudu katak munisípiu tolu ne’e violénsia hasoru feto no labrik feto aas liu.

“Ita-nia akordu serbisu ho ILO mak munisípiu Baucau, Ermera no Bobonaro tanba tuir estatístika pursentu kona-ba violénsia aas liu,” nia esplika.

Reprezentante UN Women, Kathleen M. Fitzpatrick. Imajen TATOLI/Osória Marques.

Iha fatin hanesan, Reprezentante UN Women, Kathleen M. Fitzpatrick hateten UN Women hakarak fó asisténsia ba feto no labarik feto sira hodi halo prevensaun ba serbisu sira ne’ebé mak forte no di’ak.

Nia dehan, prevensaun ne’e importante tanba bainhira ema ruma halo asédiu hasoru feto sira tenke hasee no fó hanoin katak hahalok ne’e ladi’ak.

“Ita labele nonook de’it no tauk iha kotuk maibé ita tenke brani ko’alia sai saida mak akontese ba ita tanba realidade Timor-Leste akontese. Maibé ema la ajuda hodi informa kazu ne’ebé ema ne’e enfrenta,” nia dehan.

Entretantu, KSTL ninia parseiru importante mak ILO ne’ebé fó apoiu másimu atu implementa programa Spotlight iha munsípiu tolu ho fundu rihun $15.

Alende ne’e, programa Spotlight ne’e mós hetan apoiu diretamente hosi ajénsia internasionál haat seluk mak hanesan, UN Women, UNDP, UNFPA no UNICEF.

Jornalista: Osória Marques

Editór: Câncio Ximenes

HAKEREK NO HATÁN

Please enter your comment!
Please enter your name here