Primeiru-Ministru, Taur Matan Ruak, hamutuk ho membru Governu sira defende Proposta OJE 2021 iha debate faze jeneralidade, iha sala plenária. Imajen TATOLI/Egas Cristovão

DILI, 02 dezembru 2020 (TATOLI)—Primeiru-Ministru (PM), Taur Matan Ruak, hateten VIII Governu Konstitusionál konsiente kona-ba sustentabilidade fundu petrolíferu, tanba ne’e halo ona rekomendasaun ba Ministériu Finansa (MF) hamutuk ho sosiedade atu halo ezersísiu haat.

“Dahuluk, Estadu halo ezersísiu di’ak, nune’e iha futuru bele redús gastu ne’ebé ita tenke ko’a bainhira laiha nesesidade. Ohin iha intervesaun deputadu sira katak iha programa duplikasaun, maibé naturalmente kuandu orsamentu tama ho baze programa, ministériu sira la konsege subar programa ne’ebé iha duplikasaun,” Xefe Governu afirma iha diskusaun Proposta Orsamentu Jerál Estadu (OJE) 2021 loron datuluk, iha faze jeneralidade, iha sala planária, Parlamentu Nasionál (PN), kuarta ne’e.

Aleinde ne’e, daruak maka Governu tenke halo esforsu kontinua rekolla reseita sira hotu ne’ebé lei permite no ida ne’ebé maka seidauk iha lejizlasaun tenke prodús hodi bele ajuda rekolla reseita.

Datoluk, kontinua halo empréstimu ne’ebé ho juru kiik hanesan dalan ne’ebé Estadu kontinua rekorre hanesan alternativa atu ajuda labele fó presaun maka’as ba fundu petrolíferu.

Ikus liu, la fó presaun maka’as liu ba fundu petrolíferu no estensaun vida sei dada ba oin oituan.

“Iha tempu badak ita bele fó kobertura ba mina-matan seluk kuandu kampu Bayu-Udang hotu, tanba ita iha esperansa no hatene katak esforsu barak ona tantu uluk no agora Ministériu Petróleu no Minerál atu investe,” nia akresenta.

Tanba ne’e, Xefe Ezekutivu husu esforsu no ezersísiu nasaun tomak atu garante sustetabilidade fundu soberanu.

Aleinde ne’e atu garante sustetabilidade finanseiru fundu, tuir PM prezisa Estadu no sosiedade hotu nia ezersísiu no diskute hodi bele halo poupansa ba tempu naruk.

“Ita-nia fundu petrolíferu tuir ita-nia polítika front-loading, katak ita antisipa investimentu sira ho hanoin katak to’o 2030 ita bele tama iha país ho rendimentu médiu no altu,” bia fó hanoin.

Eis Prezidente Repúblika ne’e rekoñese, desizaun saida de’it mak toma sei iha implikasaun, liuliu iha nível dezenvolvimentu nasaun tanba hanoin atu redús foti osan hosi fundu úniku maka projetu sira sei redús no intensidade dezenvolvimentu mós sei redús.

“Maibé se ita la kuda agora, ita kuu tarde no dala ruma ita hanoin atu kuda fali ninia kustu boot liu ona ida agora,” PM Taur subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here