Karreta fuzu-boot transporta sasán Cesta Báziku ba Viqueque baku-fila iha Suku Manehat, Postu Administrativu Natarbora, Munisípiu Manatuto. Imajen/foti hosi Facebook

DILI, 02 novembru 2020 (TATOLI)- Komandu Polísia Nasionál Timor-Leste (PNTL) liuhosi Servisu Investigasaun Kriminál (SIC) detein ona suspeitu motorista mane ida ne’ebé lori karreta fuzu-boot baku fila hodi rezulta vítima ida mate no “fakar” sasán Cesta Bázika iha Suku Manehaat, Postu Administrativu Natarbora, Munisipiu Manatuto.

Notísia Relevante : Kamioneta Tula Cesta Bázika “monu” iha Manehat

Parte PNTL seidauk bele fó sai suspeitu motorista ne’e nia identidade, tanba hafoin lori karreta hasoru asidente tráfegu ne’ebé rezulta vítima ida mate no na’in-rua kanek todan, suspeitu halai lakon hosi fatin akontesimentu.

PNTL Manatuto koopera no SIC nasionál no Servisu Informasaun Polísia (SIP) no Batallaun Orden Públiku (BOP) buka tuir suspeitu dezde horiseik to’o ohin kaptura iha Postu Administrativu Metinaro, Munisípiu Dili.

“Ita halo komunikasaun ho komandante PNTL Munisípiu Manatuto halo ligadu ho asidente ne’ebé akontese iha Manehaat, ne’ebé rezulta mós sidadaun ida mate no na’in-rua seluk kanek, depois kondutór dezvia tiha hosi fatin akontesimentu, entaun PNTL Munisípiu Dili mós hetan komunikasaun hosi na’in ba karreta no PNTL Munisípiu Manatuto mós halo komunikasaun hosi televizaun, entaun ohin dadeer Polísia no Unidade Espesiál Polísia (UEP) halo checkpoint iha Metinaro konsege deteta no kaptura suspeitu hodi detein kedas,” Segundu Komandante PNTL Munisípiu Dili Superintendente, Euclides Belo, ohin, informa  ba jornalista iha Komandu PNTL, Dili.

SIC entrega suspeitu ba Komandu PNTL Dili no aprezenta fali ba Komandu PNTL Manatuto halo investigasaun oras 72 depois aprezenta kazu ne’e ba Ministériu Públiku.

Kona-ba sidadaun ida ne’ebé mate iha asidente ne’e, parte PNTL mós seidauk bele fó sai ninia identidade no hela fatin, tanba sei hela relatóriu investigasaun hosi Komandu PNTL Manatuto hodi aprezenta ba Komandu Jerál PNTL.

Parte PNTL mós sei investiga patraun ba karreta na’in ne’ebé fó nia karreta ba Governu Timor-Leste liu hosi Sentru Lojístika Nasionál (CLN) hodi tula Cesta Bázika hodi Dili atu ba Manatuto.

Jornalista       : Eugénio Pereira

Editór             : Francisco Simões

 

HAKEREK NO HATÁN

Please enter your comment!
Please enter your name here