Xefe Bankada FRETILIN, Francisco Miranda Brano no Vise-Xefe Bankada CNRT, Patrocinio Fernandes dos Reis. Imajen/Media PN.

DILI, 02 dezembru 2020 (TATOLI)—Bankada Frente Revolusionária Timor-Leste independente (FRETILIN) no Bankada CNRT husu ba governu atu dezenvolve setór produtivu sira.

“Bankada FRETILIN elojia VIII Governu liuhosi Primeiru-Ministru, Jenerál Taur Matan Ruak ninia kompromisu ba dezenvolve setór produtivu sira hanesan turizmu, agríkultura no peska, importante no urjente tebes atu diversifika ita-nia ekonomia,“ Xefe Bankada FRETILIN, Deputadu Francisco Miranda Branco, informa liuhosi debate jeneralidade loron datoluk, iha plenária, Parlamentu Nasionál, kuarta ne’e.

Bankada FRETILIN ejize ona iha debate OJE 2020 liubá atu tau atensaun boot ba setór agríkola no peska, liuhusi alokasaun orsamentu no atribui kompeténsia nesesáriu ba dezenvolve setór rua ne’e.

“Ami haksolok no povu ai-leba 70% haksolok tanba iha OJE 2021 dotasaun orsamentu ba MAP sa’e ba millaun $32, kompara ho millaun $7 iha OJE 2019 no millaun $14 milhões iha OJE 2020. Katak VIII Governu komprometidu duni atu hadi’a sistema irrigasaun hodi hasa’e produsaun no produtividade, investe mós iha peska ho planu konstrusaun portu, no akizisaun ba ró peska nian,“ hateten Xefe Bankada FRETILIN.

Bankada FRETILIN realsa, investimentu iha setór produtivu mak bele atinje objetivu iha médiu no longu prazu, Timor-Leste bele hetan soberania alimentár, hetan mós fonte rendimentu seluk la’ós depende de’it ba fundu minarai.

Entretantu, Vise-Xefe Bankada CNRT, Deputadu Patrocínio Fernandes dos Reis, liuhosi deklarasaun polítika konkorda investe iha área produtivu sira.

“Ami konkorda investimentu iha área produtiva sira atu garante seguransa nesesidade bázika atu labele depende ba importasaun,” Vise-Xefe Bankada CNRT ne’e hateten.

Bankada CNRT observa VIII Governu hakarak fó prioridade ba agrikultura no turizmu maibé nia alokasaun la refleta intensaun ida-ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here