Deputadu Patrocínio dos Reis Fernandes. Imajen/Espesial.

DILI, 02 dezembru 2020 (TATOLI)—Bankada Congresso Nacional da Reconstrução de Timorense (CNRT) konsidera montante orsamentu biliaun $1.895 la refleta ho kapasidade ezekusaun Governu nian.

Bankada CNRT konsidera tinan ida-ne’e krusiál tanba ho maratona deputadu sira iha Parlamentu Nasionál diskute no aprova proposta Orsamentu Jerál Estadu (OJE) tinan-rua nian tuir-tuir malu.

Bankada CNRT sei konsistente ho prinsípiu katak legaliade mak baze fundamentál atu hametin Estadu direitu demokrátiku.

Maske nune’e, hanesan reprezentante Povu atu garante utilizasaun osan públiku nian tuir lei, deputadu CNRT konsiente ba nia responsabilidade tomak hodi ativamente kontribui ba iha prosesu audiénsia to’o iha debate iha sesaun jeneralidade ida-ne’e.

“Kompara ho OJE 2020 nian, proposta OJE 2021 ida-ne’e sa’e 27%, iha aumenta mlliaun $406. Aumenta osan la refleta ho kapasidade ezekusaun Governu nian tanba atu ramata tinan fiskál (loron 30 fulan-novembru tinan 2020) Governu foin ezekuta OJE 2020 hamutuk 61.4%, osan ne’ebé la ezekuta hamutuk miliaun $479,4 ne’ebé sei transita ba iha OJE 2021. Governu sei rai osan barak iha tezouro ne’ebé nia jurus sei laiha kompara ho osan iha Fundo Petrolífero ne’ebé sei fó funan to’o 3%,” Vise-Xefe Bankada CNRT, Deputadu Patrocínio Fernandes dos Reis, informa liuhosi debate jeneralidade loron datoluk, iha plenária, Parlamentu Nasionál, kuarta ne’e.

Bazea ba istória kapasidade ezekusaun mak biliaun $1.2 to’o biliaun $1.4, senáriu ida- ne’e mak prudente liu no bele proteze fundu rezerva ba iha sustentabilidade fiskál.

Bankada CNRT mós nota proposta-lei orsamentu OJE 2021 nia inkonstitusionalidade seidauk klaru tanba iha versaun 2, versaun Komisaun A no versaun Komisaun C iha Parlamentu Nasionál.

Opozisaun ne’e hanoin katak versaun 2 ne’e mai hosi ema jurista ne’ebé intende di’ak tebes linguajen jurídika, nune’e ema timoroan hotu hein desizaun Prezidente Repúblika hodi haruka ba Tribunál Rekursu hodi haree situasaun ne’e.

Vise-Prezidente Bankada CNRT salienta, haree husi OJE 2020 ne’ebé ho Dotasaun Orsamentu Temporáriu (DOT) de’it mós nia ezekusaun fraku, maibé obriga-aan atu jere tán osan liu biliaun $2.

Sira nota situasaun ne’e akontese tanba Governu la sukat nia kapasidade ezekusaun Orsamentu, enkuantu jere de’it DOT mós foin liu 60%, foti osan boot atu gasta, maibé ignora tiha sustentabilidade fiskál.

Bankada CNRT akuza Governu ida-ne’e iha OJE 2020 no OJE 2021 hakarak halo programa sira-ne’ebé buka fahe osan liuhosi projetu no mós programa cesta

“Tanba ami haree katak Ministériu Obra Públika (MOP) iha OJE 2020 hamosu projetu kapitál dezenvolvimentu liuhosi tranferénsia Bens no Serviços hodi hamosu projetu 162 ne’ebé to’o oras ne’e Ajénsia Dezenvolvimentu Nasionál (ADN) la verifika tanba hahú inísiu la koordena ho AND,” nia dehan.

Sira nota iha Proposta OJE 2021 aloka osan barak liu iha bens ni serviços do que tau osan iha kapitál dezenvolvimentu maibé halo atividade hanesan.

“Tanbasá maka la tau hotu iha kapital dezenvolvimentu? DOT hotu ona ho aprovasaun OJE 2020. Ami rona hosi Primeiru-Ministru katak, ADN la presiza verifika osan iha Bens no Serviços. Karik polítika ida-ne’e maka Governu uza mak hanesan ne’e duni, sees husi sistema no prosedimentu normál,” Vise-Xefe Bankada CNRT hateten.

Bankada CNRT konsidera akizisaun ba Ró Haksolok ho intensaun atu subar osan iha proposta OJE 2021 hodi uza ba buka solusaun ba Ró Haksolok.

“Osan millaun $41 ba Fiber Optica. Será que Governu ida-ne’e haree katak povu nesesita urjénti ba Fiber Optica ka lae? Tanbasá mak tenke halo iha 2021? Ida-ne’e kuandu laiha, Povu bele mate ka oinsá,” nia dehan.

Bankada CNRT konkorda halo investimentu iha área produtiva atu garante seguransa nesesidade básika atu labele depende ba importasaun.

“Tanba-ne’e, ho laran triste deklara katak ami la envole tomada desizaun proposta OJE 2021, ami iha mekanismu rasik atu mantein silénsiu hodi la foti desizaun ba kualker aprovasaun OJE ida-ne’e. Ami sees atu hosi dalan luan ba ita-boot sira aprova OJE 2021 ida-ne’e,” deklarasaun polítika Bankada CNRT molok tama ba votasaun faze jeneralidade.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here