Mariano Assanami Sabino. Imajen/Antonio Goncalves

DILI, 02 dezembru 2020 (TATOLI)—Deputadu bankada Demokrátiku (PD), Mariano Assanami Sabino, husu ba Governu atu tau osan hodi halo hotu projetu estrada, projetu eletrisidade no husu Governu tenke investe iha bee-moos.

“PD sei halo proposta balu ne’ebé ke tau iha orsamentu ida-ne’e, liuliu oinsá mak atu remata tiha infraestrutura sira hanesan estrada, eletrisidade, infraestrutura ba saúde, ba edukasaun, uma ba médiku sira iha área rurál, uma ba profesór sira. PD nia pozisaun ba bee-moos durante ne’e ko’alia beibeik no haree katak orsamentu ida-ne’e mós tau ona osan maibé seidauk asegura bee-moos iha territóriu tomak,” Assanami propoin liuhosi debate jeneralidade loron daruak ba OJE 2021, iha plenária PN, kuarta ne’e.

Tuir nia, eletrisidade no Estrada importante ba sosiedade hodi partilla produtu potensiál sira ba iha merkadu maibé Estrada ne’e mós tenke garante ba movimentu transporte públiku.

Nia fundamenta, estrada no eletrisidade fasilita ona komunidade entaun Governu tenke iha polítika hodi aposta ba bee-moos tanba bee-moos ne’e importante tebes.

Eis Ministru Arikultura no Peska ne’e argumenta, elementu tolu importante hanesan rai, bee no loron-matan ne’ebé bele fó solusaun ba setór hotu-hotu.

“Tanba bee ba ai-horis, bee ba ema, bee ba enérjia no bee ba animál. Kuandu ita iha bee-moos ne’ebé sufisiente ita mós sees hosi mudansa klimátika tanba ne’e mak PD nafatin aposta ba barrajen,” Prezidente Partidu Demokrátiku ne’e fó hanoin ba Governu.

Assanami afirma, ema barak mak ko’alia prioridade agrikultura hanesan ema hotu la komprende agrikultura.

“Setor agrikultura iha elementu tolu ne’e mak hakarak ka lakohi tenke investe, ida mak rai, loron-matan no bee, tanba ne’e mak ita seidauk halo barrajen entaun seidauk iha bee natoon. Ita seidauk aposta polítika bee-moos nu’udar Estadu. Tanba ne’e mak barrajen ne’e importante,” nia dehan.

Deputada Bankada Demokrátiku ne’e fó hanoin ba Governu atu investe makaas iha barrajen nune’e bele prodús efeitu sira ba agrikultura hanesan natar no sesesidade importante sira seluk.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here