DILI, 01 dezembru 2020 (TATOLI)—Xanana Reading Room (XRR) ho Grupu Youth Community Care (YCC), iha tersa (01/12) selebra loron mundiál HIV/SIDA ho atividade semináriu ba joven sira kona-ba meius prevensaun.

”Loron 1 fulan-dezembru ne’e loron ne’ebé mak atu selebra moras HIV/SIDA iha mundu tomak tanba ne’e mak ita halo semináriu ne’e hodi fahe informasaun ba joven sira hanesan estudante UNDIL, DIT,  IOB, UNPAZ inklui mos juvetude husi  RYLA (Rotary Youth Leadership Awards) atu prevene an ba moras HIV/SIDA iha futuru,” dehan responsavel komisaun organizadora,  Jeronimo Fernandes, iha sala leitura Xanana Bidaun Lecidere , tersa ne’e.

Notísia Relevante :Labele deskrimina pasiente HIV/SIDA

Joven sira maka nasaun nia fututu tanba ne’e, nia dehan labele ransu livre tanba liuhosi  relasaun seksuál arbiru fasil atu hetan infeksaun HIV/SIDA.

“Moras ne’e da’et ema ida ba ema seluk liuhusi relasaun seksuál no ita tenke enkoraja ita-nia joven sira para labele hetan HIV/SIDA tanba moras ne’e moras at ida bainhira ita la kuidadu an mak sei moris ho HIV tinan naruk,” nia esplika.

Iha fatin hanesan Reprezentante ONG Estrela + Timor-Leste,  Herman Martins, hateten daudaun nia parte esforsu maka’as atu servisu hamutuk ho parseiru sira hanesan Maluk Timor, Ministériu Saúde atu bele redúz estigmasaun  hasoru  ema moras HIV iha Timor-Leste.

Organizasaun ne’e mós koko atu halo advokasia  ba públiku liuhosi rádiu, televizaun no seluk tan hodi redúz estigmasaun no deskriminasaun hasoru ema ho moras HIV/SIDA iha territóriu Timor-Leste.

Notísia Relevante :Timoroan 1.256 mak sofre HIV/SIDA, mate 140

Jornalista : Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here