Diretór Jerál STAE, Acilino Manuel Branco

DILI, 01 dezembru 2020 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Branco, propoin presiza halo alterasaun ba lei eleisaun Parlamentár no Pezidensiál tanba eleisaun antes ne’e limita ema-nia direitu ba vota.

Notísia Relevante: Dezembru nia klaran, STAE sei suspende provizóriu atendementu kartaun eleitorál

“Ita presiza halo alterasaun ba lei eleisaun Parlamentár no Prezidensiál tanba eleisaun antes ne’e ita-nia eleitór sira, barak mak labele ezerse sira-nia direitu ba vota,” Diretór Jerál STAE, Acilinio Branco, hateten ba Agencia Agencia TATOLI iha nia serbisu fatin Vera-Crus, Dili, terssa ne’e.

Acilino fó ezemplu katak, lei ne’e limita sidadaun balun labele fó sira-nia votu hanesan jornalista no ema ho defisiénsia inklui ema orijinalidade jeografikamente. Maski nune’e, nia hatutan, buat hirak ne’e hotu Governu sei rona hosi parte hotu-hotu hafoin deside no rezultadu sei hato’o ba iha Parlamentu Nasionál.

Nia mós esplika, iha natureza lei ne’e, hateten katak parte hirak ne’e mak dala ruma involve direta no indireta ba implementasaun ba lei hirak ne’e rasik.

Diretór ne’e rekoñese, hanesan implementadór, hanoin buat balun ne’ebé mak presiza mellora no fó espasu atu bele akomoda preokupasaun hanesan fatin ba ema ho defisiénsia, estudante inklui ba jornalista sira.

Alterasaun ba lei eleisaun prezidensiál no Parlamentar, diretór STAE subliña, to’o oras ne’e seidauk hatene lei artigu hira mak atu altera no aumenta iha parte saida, depois mak halo ajustamentu tanba desizaun hotu mai hosi órgaun kompetente loloos.

Nia mós informa katak, proposta ida-ne’e hanesan inisitiva ida-ne’ebé mak Ministériu Administrasaun Estatál (MAE) konvoka maibé prosesu hotu sei liuhosi Governu no Parlamentu Nasionál.

“Bainhira Parlamentu Nasionál aprova ona no hetan ona promulgasaun hosi Prezidente Repúblika mak ita foin hatene katak lei artigu hira mak muda no aumenta fali hira, ne’e ita hein de’it,” nia fó hanoin.

Acilino Branco mós informa, STAE iha hanoin ida katak presiza iha eleisaun ne’ebé mak kualidade liu maibé tenke iha enkuadramentu legál ne’ebé mak  di’ak liu atu fasilita órgaun rua hanesan STAE no CNE, nune’e sira bele hala’o sira-nia knaar ho di’ak liután.

Tuir nia, esperiénsia tinan kotuk ne’ebé simu rekomendasaun hosi observadór  internasionál sira henesan Uniaun Europeia (UE) katak sira apresia tebes ho prosesu eleitorál iha Timor-Leste nian.

“TL iha prosesu ne’ebé mak susesu no taxa partisipsaun aas mezmu iha rekomendasaun tékniku balun tenke hadi’a,” nia informa.

Tanba ne’e, nia dehan, bainhira atu fasilita ema ho defisiénsia mak presiza iha regulamentu ida hodi regula ka tenke iha enkuaramentu legál.

“Ho ne’e, ita halo diskusaun ho parte relevante hotu, atu rona opiniaun sira balun hodi oinsá mak ita akomoda númeru ema ho defisiénsia rihun 30 ne’e. Tanba ne’e, ita presiza regulariza lei ka dekretu Governu ida hodi nune’e, ita fasilita no administra hodi rejistu,” nia subliña.

Jornalista: Osória Marques

Editór: Cancio Ximens

HAKEREK NO HATÁN

Please enter your comment!
Please enter your name here