Koordenadór Nasionál Rede ba Rai, Horténcio Pedro Vieira. Imajen TATOLI/Osória Marques.

DILI, 01 dezembru 2020 (TATOLI)—Koodenadór Rede ba Rai, Horténcio Pedro Vieira hateten Governu presiza klarifika alokasaun orsamentu ba kazu disputa rai iha munisípiu sira-ne’ebé mak la hanesan.

Notísia Relevante: Governu presiza dezenvolve lejislasaun no polítika rai tuir kontestu TL

“Alokasaun orsamentu 2021 hodi rezolve disputa no despezu ka hasai ba rai no propriedade Estadu nian, ba kada munisípiu la hanesan tanba, kazu disputa rai hamutuk 16 maibé ninia alokasaun la lójika. Alokasaun hirak ne’e mós la klaru no laiha esplikasaun detallu bazea ba análiza Ministériu Justisa (MJ) nian kona-ba lista kazu iha kada munisípiu,” Horténcio Pedro Vieira hateten lia hirak ne’e iha salaun FONGTIL, Caikoli, Dili, tersa ne’e.

Koordenadór ne’e dehan, loos duni maske alokasaun orsamentu kiik maibé ne’e estrañu uitoan tanba kuantidade alokasaun ne’ebé la hanesan.

Nia haktuir, kazu disputa rai iha munisípiu sira no kada munisípiu hamutuk 16, hanesan iha Munisípiu Baucau iha kazu 16 no aloka osan $22,453, iha Munsípiu Bobonaro ne’e prosesu no kuantidade kazu hanesan maibé ninia alokasaun orsamentu mak $2,860 de’it.

Alende ne’e, nia informa, iha Munisípiu Lautém iha mós kazu hamutuk 16 no osan ne’ebé aloka hamutuk $20,964, Munisípiu Manatuto nian aloka osan ne’ebé kiik tebes hamtuk $720 de’it ho kuantidade kazu hamutuk  16, inklui Munisípiu Viqueque mós iha kazu 16 ho nia alokasaun $2,220.

Koordendór Rede ba Rai ne’e, preokupadu ho kestaun ne’e no rekomenda ba Parlamentu Nasionál (PN) tenke husu klarifikasaun ho detallu ba Ministru Justisa (MJ) kona-ba montante orsamentu ne’ebé mak la hanesan ba kada munisípiu.

Nia fó hanoin, presiza husu esplikasaun kona-ba rai ektare hira mak Governu hakarak atu rezolve no lista kazu iha ne’ebé, no MJ presiza foti kazu ne’e tuir duni prosedimentu ne’ebé hakerek iha lei ba rai númeru 13/2017 no lei espropriasaun númeru 8/2017.

“Ho ida-ne’e, ami hein katak hosi análize ba kazu hirak ne’e, bele ajuda PN, nune’e bele tau prioridade iha OJE 2021 nian, atu bele estabelese programa no proteza duni povu nia direitu ba rai,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here