Embaixadór Portugal iha Timor-Leste, José Pedro Machado Viera, entrega xave Pouzada Maubara ba Ministra Adaljiza Albertina Xavier Reis Magno. Imajen Tatoli/Domingos Piedade

DILI, 01 dezembru 2020 (TATOLI) –  Governu Portugal liuhosi nia embaixada  iha Timor-Leste asina ona memorandu  entendimentu (MoU) ho Ministériu Negósiu Estranjeiru no Kooperasaun (MNEC) hodi entrega Pouzada Maubara ba Governu Timor-Leste.

Embaixadór Portugal iha Timor-Leste, José Pedro Machado Viera, kaer-liman ho MNEC Adaljiza Albertina Xavier Reis Magno. Imajen Tatoli/Domingos Piedade

“Ita asina ona memorandu entendimentu ida ho Embaixada Portugal ne’ebé sira finalize ona reabilitasaun ba Pouzada Maubara, liuhosi servisu kooperasaun hosi programa “biti-boot” ne’ebé mak implementa hosi institutu Camões ne’ebé remata ona sira entrega mai MNEC tanba uluk MNEC mak halo kooperasaun ne’e ho Governu Portugal,” Ministra Negósiu Estranjeiru no Kooperasaun, Adaljiza Albertina Xavier Reis Magno, hateten ba jornalista-sira iha salaun MNEC, Dili.

Bainhira simu tiha xave hosi Embaixadór Portugal, José Pedro Machado Viera, Ministra Adaljiza entrega kedan ba Ministériu Turizmu Komérsiu no  Indústria (MTCI) ne’ebé hanesan na’in ba pouzada ne’e.

“Ami entrega kedan pouzada ne’e ba MTCI para sira bele haree oinsá hodi halo kontratu fali ho setór privadu-sira atu kontinua tau matan ba pouzada ne’e,” Ministra Adaljiza hateten.

Pouzada ne’ebé reabilita hosi Governu Portugal ne’e kompostu hosi kuartu hitu (7) ho nia artístiku ne’ebé furak no bele atria turista sira bele ba vizita.

Prosesu reabilitasaun ne’e hahú iha 2017 no remata iha 2020 hafoin entrega ba governu Timor – Leste.

Iha fatin hanesan Ministru Turizmu Komérsiu no Indústria,  José Lucas do Carmo da Silva hatete, agradese ba Governu Portugal ne’ebé laran luak halo ona reabilitasaun ba Pouzada Maubara.

“Ita agradese ba Governu Portugal liu hosi nia embaixada iha ne’e ho nia programa biti boot ne’ebé reabilita ona ita nia Pouzada Maubara ne’ebé hanesan sítiu istóriku ida ba ita. Ida ne’e atu dehan de’it ba ita aliña kedan ho programa VIII Governu nian nune’e mós ba programa planu ekonómiku nian oinsá estimula no rekoopera fali ita nia setór turizmu,” nia hateten.

Ba oin, MTCI sei koordena ho Ministériu Justisa ne’ebé na’in ba rai hodi haree kontratu oinsá bele fó ba setór privadu-sira nune’e bele dezenvolve fatin ne’e hodi hatama reseita ba Estadu.

Embaixadór Portugal iha Timor-Leste, José Pedro Machado Vieira, haktuir programa refere hanesan kooperasaun ida entre Governu Timor-Leste no Governu Portugal hodi ajuda dezenvolvimentu nasaun ne’e nian.

“Pouzada ne’e remata ona entaun ohin ami entrega ho formalmente ba Governu Timor-Leste,” nia tenik.

Nia subliña, ba oin programa ne’ebé nasaun rua iha ona sei kontinua oinsá haree ba fatin turizmu sira ne’ebé abandona hela.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here