Primeiru-Ministru, Taur Matan Ruak, hamutuk ho membru Governu sira defende Proposta OJE 2021 iha debate faze jeneralidade, iha sala plenária. Imajen TATOLI/Egas Cristovão

DILI, 01 dezembru 2020 (TATOLI)--VIII Governu Konstitusionál prevee orsamentu tinan fiskál 2021 ho montante millaun $470 atu reforma no dezenvolve institusionál atu fó atedimentu efisiésia no efikásia ba sidadaun sira.

Primeiru Ministru (PM), Taur Matan Ruak, hateten  polítika dezenvolvimentu institusionál inklui justisa, administrasaun públika, seguransa, defeza no negósiu estranjeiru, nune’e mós despeza ba ministériu no ajénsia sira ne’ebé halo servisu internu ba Governu, hanesan Ministériu Planu no Ordenamentu no Ministériu Finansa.

“Iha tinan 2021, ita planea programa ho gastu millaun $470 ba dezenvolvimentu institusionál. Ida ne’e ekivale ho baluk haat hosi orsamentu, inklui seluk atu reforma institusionál boot haat, reforma 4G ne’ebé Governu dezeña no implementa hela, no planu nasionál kona-ba ordenamentu territóriu ne’ebé investe millaun $3,8,” PM Taur hateten iha debate loron daruak Orsamentu Jerál Estadu (OJE) 2020 iha faze jeneralidade, iha sala plenária, Parlamentu Nasionál (PN), tersa ne’e.

Ba reforma no dezenvolvimentu institusionál, Governu sei define ho forma sistemátika no universu hosi timor-oan no mós estranjeiru ne’ebé hela iha nasaun ne’e bazeia ba rejistu sivíl modernu no sistema dijitál.

“Ita sei konklui enkuadramentu jurídiku lei rai no sasán imóvel no mós rejime jestaun. Ita sei define baze ba ordenamentu no utilizasaun teritoriál inklui moderniza administrasaun públika,” nia akresenta.

Prezidénsia Konsellu Ministru sei koordena reforma 4G inklui alterasaun jurídika importante sira, ne’ebé inklui reforma administrasaun públika no alterasaun jestaun finansa públika, ne’ebé sei aprezenta ba Parlamentu Nasionál (PN) hafoin debate orsamentu ne’e.

Apoiu no aprovasaun ba lei hirak ne’e hosi PN sai hanesan pasu importante ida atu hametin kapasidade jestaun no efisiénsia operasaun Estadu.

Reforma 4  foka liu ba deskonsentrasaun no desentralizasaun ba prosesu foti desizaun no rekursu sira, iha reforsu ba responsabilizasaun no governasaun di’ak, modernizasaun, promosaun no inovasaun, reforsu ba efisiénsia no relasaun di’ak ba kustu benefísiu.

“Reforma hirak ne’e inklui reforma administrasaun públika, reforma jestaun orsamentál no finanseira, desentralizasaun no reforma judisiál no lejizlativa,” nia akresenta.

Ba dahuluk, Governu sei hadi’a klima negósiu atu fasilita dezenvolvimentu iha setór privadu no  kontinua prosesu rasionalizasaun rejistu no lisensiamentu empreza, ne’ebé bele la’o neineik liu no arbitráriu no burokrátiku liu.

“To’o tinan 2021 nia rohan, ita planea atu iha sistema rejistu ba prédiu ka títulu propriedade nian. Hatene tuir se mak sai rai rohan ida-idak nia na’in no bele reforsa ativu sira atu empresta fundu hodi haluan negósiu, liuhosi ipoteka sai baze esensiál hosi Estadu modernu ida no ekonomia moderna ida,” nia hatutan.

Ba daruak, kria sistema governasaun tenke modernizadu atu nune’e sidadaun sira bele hetan asesu ba servisu liuhusi online ho baze estratejia Governasaun Eletrónika (e-goverment) mak atu kria identidade únika no dijitalizada ba sidadaun hotu.

Datoluk, kontinua implementa reforma planeamentu no orsamentasaun oioin lubun ida, liuliu orsamentu Estadu tenke adota abordajen orsamentu tuir programa atu hadi’a transparénsia, kustu servisu, responsabilizasaun ba rezultadu no tuirmai dezempeñu Governu.

Dahaat, reforma jestaun finanseira, Governu sei diversifika fonte reseita públika atu jere di’ak liu pagamentu impostu ne’ebé atraza no kontinua atu dezenvolve estratéjia prudente kona-ba jestaun dívida.

Governu prezia reforsa autoridade aduaneira no tributária, hodi hametin sira-nia dezempeñu no responsabilidade no tenke hadi’a lalais ezekusaun orsamentál iha projetu kapitál.

“Ita sei atualiza sistema jestaun finanseira ne’ebé informatizadu, ne’ebé daudaun ne’e uza, atu nune’e parte ne’ebé sai na’in orsamentu bele iha informasaun kompleta, atualizada no loloos kona-ba fundu ne’ebé iha,” nia hatutan.

Dalimak, desentralizasaun maka prosesu esensiál atu lori prestasaun servisu besik liután ba populasaun no reforsa responsabilidade ba komunidade lokál no kontinua reestrutura instituisaun sira hodi garante rekursu umanu no finanseiru distribuídu ho di’ak iha país laran tomak.

Ikusliu, hametin sistema judisiáriu nu’udar buat ne’ebé importante tebes tanba sidadaun sira depende ba sistema justisa justu, efisiente no asesível no dezenvolve meiu estrajudisiál sira ba rezolusaun litíjiu, hanesan arbitrajen no mediasaun inklui kontinua garante papél relevante hosi justisa tradisionál no dalan tesi lia tuir  kostume.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here