Manajer Programa OXFAM, Lúcio Sávio, Imajen TATOLI/Osória Marques.

DILI, 01 dezembru 2020 (TATOLI)—Forum Oraganizasaun Naun Governamentál Timor-Leste (FONGTIL) liuhosi nia NGO Intrenasionál OXFAM, husu ba Governu no Paralamentu Nasionál (PN) atu tau prioridade iha investimentu agrikultura iha proposta Orsamentu Jerál Estadu (OJE) tinan fiskál 2021.

Manajer Programa OXFAM, Lúcio Xávio hateten, OJE 2021 presiza investe iha setór agrikultura hodi diversifika ekonomia sustentável no inkluzivu.

“Ita haree Timor-Leste nia-ekonomia depende ba fundu petrolíferu, sai nu’udár fundu úniku hodi viabiliza ekonomia rai-laran. Governu Timor-Leste kada tinan halo levantamentu ba setór hotu-hotu inklui ba mega projetu sira hanesan. Projetu Tasi Mane no ZEESM ne’ebé hetan porsaun boot liu kompara ho setór agrikultura, turizmu, edukasaun no saúde,” Lúcio Xávio hateten lia hirak ne’e iha salaun FONGTIL, Caicoli, Dili, tersa ne’e.

Tanba ne’e, OXFAM husu nafatin ba Governu Timor-Leste atu dezeña planu klaru no aloka orsamentu hodi diversifika ekonomia, liuliu hasa’e produsaun agríkola no setór informál hodi investe iha kapitál umanu, atu sustentabiliza no dinamiza ekonomia rai-laran.

Nia dehan, presiza diversifika ekonomia tanba tuir dadus agrikultura hosi tinan 2015-2017 ema ne’ebé servisu nu’udar agrikultór iha Timor-Leste fonte prinsipál ba sustenta família kuaze 80%, no adultu 64%.

“Maibé ita haree iha área agrikultura ladún hetan atensaun sufisiente dezde tempu naruk no alokasaun orsamentu maka laiha aumentu hosi tinan ba tinan. Nune’e refleta iha OJE 2021, husi biliaun $1,895 alokasaun ba agrikultura maka hetan de’it  2.1%. Maski Governu friza iha Planu Rekoperasaun Ekonomika (RDTL 2020) katak “agrikultura ida forte sei sai xave ba hadi’ak seguransa ai-han no proteje ita-nia ekonómia husi krize iha futuru no mós OJE 2021 Governu aloka 11% atu konstrui no reabilita estrada rurál sira,” nia hateten.

Maske nune’e, Governu ladún identifika no prioritiza estrada rurál sira ne’ebé maka liga ho área produsaun agrikultura no asesu ba merkadu.

“Ami-nia rekomendasaun ba Parlamentu Nasionál mak iha debate OJE 2021, alokasaun oramentu ne’e bele prioritiza estrada rurál sira ne’ebé bele apoiu ligasaun produsaun agrikultura ba merkadu no  investimentu OJE 2021 ne’e. Iha agrikultura sufisiente atu hadi’ak no konstrui irigasaun, fasilita prosesu merkadoria no imput agrikutlura atu ajuda to’os na’in ka lae,” nia subliña.

Nia dehan, investimentu merkadu sustentável presiza ho perspetiva jéneru no inkluzaun tanba merkadu lokál sira sai xave ba atividade ekonómia, 75-85% vendedór iha merkadu maka feto, maibé agrikultór vendedora (feto) no ema ho defisiénsia hasoru risku boot bainhira atu transporta no faan sira nia produtu iha merkadu no jestaun merkadu sira ladun la’o ho di’ak.

“Iha OJE 2021 Ministériu Turizmu no Komérsiu-Indústria (MTKI) sei investe $121,716 atu konstrui fasilidade komersiál hodi responde agrikultór no vendedór feto sira-nia nesesidade, ne’e  di’ak tebes,” nia tenik.

Tanba ne’e, OXFAM hein, Governu bele investe liután iha merkadu lokál sira no asegura feto no grupu vulnerável sira iha papél másimu iha jestaun merkadu no hola parte iha dezeñu merkadu foun sira hosi inísiu kedas.

Joranlista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here