Obra "koloniál" Portugés nian ne'ebé iha poténsia turistíka no abandonadu hela iha Alaua Kraik, Postu Administrativu Baguia, Munisípiu Baucau. Imajen/foti hosi Facebook

DILI, 01 dezembru 2020 (TATOLI) – Obra edifísiu “koloniál” Portugés nian ne’ebé harii iha tempu Portugés nia ukun iha Timor-Leste bele dehan barak tebetebes iha territóriu nasionál. Maibé obra-sira ne’e, barak mós abandona ona no husik fuik tiha de’it.

Prizaun Ai-Pelo, Liquiça. Imajen/foti hosi Google

Bainhira  obra-sira  ho arkitetura úniku ne’e reabilita bele sai valor turístiku no atrai turista-sira estranjeiru vizita  ba Timor-Leste no bele halo Timor-Leste hanesan nasaun ne’ebé úniku iha rejiaun Sudeste Aziátiku no Pasífiku.

Haree ba karaterístiku no arte edifísiu istóriku-sira ne’ebé Portugés husik hela bele lori poténsia ba valor turístiku,   Ministru Turizmu Komérsiu no Indústria (MTKI) José Lucas do Carmo da Silva, hanoin ona atu halo reabilitasaun  atu bele kontribui ba reseita Estadu nian liuhosi setór turizmu.

“Timor ne’e úniku iha Ázia tanba fatin turizmu antigu barak ho obra Portugeza nian. Entaun ita tenke dezenvolve ida-ne’e para hatama fali reseita ba kofre Estadu,” hateten  Ministru  José Lucas do Carmo da Silva, ba Agência Tatoli, ohin, bainhira partisipa iha serimónia termu entrega Pouzada Maubara hosi Embaixada Portugal ba Ministériu Negósiu Estranjeiru no Kooperasaun (MNEC)  Timor-Leste  iha edifísiu MNEC,  Dili.

Nia hateten, ho  karaterístiku obra ka edifísiu-sira Portugés ne’ebé  iha valor boot ba setór turizmu, maka MTCI hanoin atu koopera ho Governu Portugal liuhosi nia embaixada iha Dili atu bele halo reabilitasaun.

“Ita hanesan rai-na’in, maluk sira hanesan Governu Portugal sira mak hakarak atu hadi’a fila fali sira nia obra istóriku sira. Ita tenke simu tanba bele fó benefísiu mai ita,”  Ministru José Lucas do Carmo da Silva hateten.

Escola do Reino do Venilale harii iha tinan 1933. Imajen espesiál/Isidoro Correia

MTCI rasik, Ministru José lia tun tan, halo ona identifikasaun ba fatin turizmu ho obra Portugés nian, maibé Ministru ladún lembra hamutuk hira. Maske nune’e, Governu tau ona iha konsiderasaun atu dezenvolve hodi bele kontribui reseita ba Estadu.

Programa Governu nian ba setór turizmu

Liuhosi publikasaun www.go.tl kona-ba programa Governu daualuk nian iha setór turizmu, hanesan motór importante ba dezenvolvimentu atividade ekonómika, hodi kontribui mós ba salvaguarda ka defeza patrimóniu natural no kulturál Timor-Leste nian.

Ho beleza (ka nia furak) natural ne’ebé la kompara ho seluk, ho istória ida ne’ebé rika tebetebes no patrimóniu kulturál ida úniku, Timor-Leste iha kondisoens tomak atu dezenvolve ninia setór turístiku orijinál duni, ne’ebé envolve liu-liu nia povu rasik no kria empreza ho oportunidade empregu ne’ebé diversifikada.

Governu sei ho forma planeada no organizada, dezenvolve estratéjia ida ba turizmu iha rejiaun, no la buka kompete ho turizmu boot iha Sudeste Aziátiku, mas bele kria sinerjia ho lokalidade seluk iha rejiaun, hanesan Flores, Molucas no Kupang, atu dezenvolve pakote turístiku ne’ebé bele atrai vizitante hosi Indonézia, Austrália no hosi país seluk iha Ázia ho Pasífiku.

Iha programa Oitavu Governu nian bele mós aposta iha turizmu ne’ebé bazeia ba lasu istóriku no kultura komún, inklui denominadór komún hosi lian portugés, hodi promove inisiativa iha ámbitu nasaun CPLP. Maibé, no tanba konsidera mós pozisaun estratéjika Timor-Leste nian iha kuadru ASEAN, presiza mós loke dalan ba relasoins istórika no kultura sekulares ne’ebé liga povu luzu-aziátiku iha rejiaun, hanesan Melaka, Sri Lanka, Macau, Banguecoque, Goa, entre seluk.

Timor-nia turizmu bele konta ho vantajen kompetitivu, hanesan tuir mai:

  1. Hanesan país katóliku ida iha rejiaun, ne’ebé pratika rituais katóliku ne’ebé bele serve hanesan atrativu ba turista katóliku hosi rejiaun;
  2. Hanesan país ida ho istória únika no resente (ka sei foun hela), ho fatin simbóliku barak atu vizita;
  • Iha potensiál boot tebes atu dezenvolve turizmu foho nian no proporsiona atividade desportiva no aventura nian, ne’ebé serve hanesan atrativu ba kamada ida importante hosi turista;
  1. Iha kosta ne’ebé naruk ho praia ne’ebé furak no nakonu ho biodiversidade, ne’ebé iha potensiál boot ba dezenvolvimentu desportu, aventura no atividade marítima, inklui ‘snorkeling’ ho mergullu (ka luku);
  2. País ida ne’ebé halo mós parte ba Inisiativa Triângulu Koral, hodi proteje abundánsia ho diversidade vida mariña iha bee-laran Timor-Leste nian, ho atensaun espesiál ba área hale’u illa Ataúro, ohin-loron rekoñesidu hanesan lokál subakuátiku ho biodiversidade boot liu hotu iha mundu;
  3. Iha ninia gastronomia únika ne’ebé iha expansaun (ka buka aumenta liután) kahur ho tradisaun gastronómikas seluk;
  • Mantein komunidade ansestrais (ka husi tempu bei’ala sira), ne’ebé sei iha ninia ambiente natural, ne’ebé ema bele vizita no estuda, hosi perspetiva turístika, ou antropolójika no akadémika, buat ne’ebé sei bele kontribui mós ba konsolidasaun identidade nasionál, ne’ebé reflete iha proposta no iha produtu turístiku ne’ebé aprezenta;
  • Nia paizajen, ne’ebé seidauk esplora no kondisoens naturaís ne’ebé sei prezerva didi’ak ninia meiu ambiente, ne’e hanesan katalizadór importante ida ba dezenvolvimentu turizmu komunitáriu no ekolójiku;
  1. Timor-Leste sei iha hela nia prosesu adezaun plena ba ASEAN, ne’ebé sei permite aumenta nia esforsu ba promosaun iha merkadu ne’ebé besik;
  2. Lokalizada mós iha pozisaun estratéjika ida (destinu tropikál no iha rejiaun aziátika ne’ebé populasaun barak liu iha mundu);
  3. Finalmente, Timor-Leste iha índise ki’ik liu, iha mundu, kona-ba kriminalidade.
    Nune’e, iha merkadu global ida ne’ebé buka oferta turístika ne’ebé foun no auténtika, Timor Leste bele hatuur nia-aan ho kompetitividade boot, liu-liu iha rejiaun, haree ba nia diferensa. Maibé, nesesáriu atu dezenvolve estratéjia efikás ida ba atrasaun turístika, ne’ebé promosaun ho marketing sai fundamentais hodi hatudu kompetitividade ne’e.

Tanba ne’e, iha abordajen dahuluk, sei bele investe iha promosaun ba tipu turizmu hanesan:

  • Turizmu Komunitáriu no Ekolójiku;
  • Turizmu Aventura (inklui montañizmu ka sa’e foho, mergullu ka luku no snorkeling ho tandesportus radikais seluk);
  • Turizmu Relijiozu;
  • Turizmu Istóriku no Kulturál;
  • Turizmu Etnográfiku;
  • Turizmu Lazer no Balnear ka hariis tasi.

Jornalista : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here