Logotipu TDD. Imajen Tatoli/Egas Cristóvão

DILI, 01 dezembru 2020 (TATOLI)-Membru Polísia Nasionál Timor-Leste (PNTL) na’in-tolu ho inisiál CMC, MP ho CF  sai arguidu iha Tribunál Distritál Dili (TDD) tanba arguidu-sira hanesan ko-autór material  forma konsumadu  krime ofensa integridade fízika agravadu, p. ep. pelo art, 146° al.e) e art. 147  iha kódigu penál Timor-Leste.

Tuir loloos iha audiénsia julgamentu ne’e Tribunál atu rona deklarasaun arguidu no sasin-sira, maibé juis titular iha turnu seluk hodi atende prosesu seluk  no  sasin seluk mós la marka prezensa. Nune’e, Tribunál deside adia fila-fali julgamentu ne’e ba iha loron  16 marsu  2021, tuku 9:30 Otl.

Tuir informasaun ne’ebé Tatoli asesu hosi Ministériu Públiku (MP)  katak,  prosesu ne’e rejista ho númeru NUC 0008/191 no arguidu na’in-tolu hanesan membru PNTL ne’ebé koloka iha Eskuadra Polísia Maubara, Munisípiu Liquiça,   iha loron 07 fevereiru 2019, iha tuku 08:30 Otl, hamutuk ho sira-nia kolega membru PNTL seluk, ema na’in-hitu (7) ba halo atuasaun ba vítima Hermínio hanesan suspeitu ba krime danu ne’ebé akontese iha aldeia Vatunau, Maubara.

Kuandu to’o iha vítima nia uma, membru PNTL sira husu tuir kondisaun vítima nian ba testemuña Dulce hanesan vítima nia espoza, hafoin Dulce konta hotu tiha, arguidu na’in-tolu tama kedas ba vítima nia kuartu-laran hodi rasta vítima, tuku, tebe dala barak iha vítima nia isin lolon no dada sai ba li’ur hodi kontinua tebe dala barak iha vítima nia isin lolon, halo vítima laiha forsa no dezmaia tiha maka arguidu-sira obriga vítima atu sa’e karreta, maibé vítima laiha forsa atu sa’e karreta.

Tuir mai, arguidu-sira silu vítima nia liman no ain hodi soe tama ba karreta PNTL nian no lori ba Eskuadra Polísia Maubara no hatama iha sela detensaun, iha horas la apuradu, membru PNTL ida ne’ebé la identifika telefone ba testemuña Dulce atu ba haree vítima nia kondisaun iha sela-laran.

Dulce  dezloka ba eskuadra Maubara hodi haree vítima iha sela-laran, iha momentu ne’e, bolu vítima maibé vítima nonook de’it no la hatán buat ida, tanba ne’e testemuña husu ba arguidu CMC atu lori vítima ba uma hodi fó ai-moruk tradisionál maibé arguidu CMC dehan labele, husik nia iha sela.

Depois testemuña fila ba uma hodi prepara hahán atu tori fali ba eskuadra PNTL hodi fó ba vítima, maibé iha purvolta tuku 14h00, arguidu CMC ho membru PNTL seluk, transporta fali vítima ba nia uma  iha momentu ne’e  vítima nia fen rekuza hodi simu vítima tanba nia haree kondisaun vítima nia kaben mutin sulin sai, matan laran malahuk, nehan tata metin no isin la book-aan, entaun PNTL sira la konsege hatún vítima maibé bolu  vítima nia fen hodi sa’e hotu karreta no sira transporta vítima ba ospitál Liquiça, maibé haree ba vítima nia kondisaun ne’ebé grave ona entaun transporta tutan ba HNGV, maibé ikus labele salva vítima nia vida hodi hakotu iis iha loron 09  fevereiru 2019, tuku 04:00  madrugada.

Arguidu sira ho forma livre, deliberadamente, konsientemente ofende vítima nia isin lolon no la lori lalais vítima ba tratamentu saúde rezulta vítima  mate. Arguidu-sira hatene katak hahalok ne’e proibidu no hetan punisaun tuir lei penál, maibé sira kontinua prátika asaun ne’e.

Jornalista: Nelson de Sousa

Editór: Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here