DILI, 01 dezembru 2020 (TATOLI)—Bankada Kmanek Haburas Unidade Nacional Timor Oan (KHUNTO) sei vota a-favór ba orsamentu ho montante millaun $14 atu finaliza prosesu kontrusaun ba Ró Haksolok maibé Prezidente RAEOA, Arsénio Paixão Bano, tenke garante ró refere mai Timor-Leste.
Notísia Relevante: RAEOA propoin millaun $127 inklui millaun $14 finaliza Ró Haksolok
“Ami na’in-lima iha-ne’e sei vota a-favór ba orsamentu millaun $14 ne’ebé atu finaliza Ró Haksolok maibé ró ne’e tenke to’o mai Timor-Leste. Se la to’o mai entaun ne’e Prezidente RAEOA tenke responsabiliza,” Xefe Bankada KHUNTO, Deputada Olinda Guterres, levanta liuhosi debate jeneralidade loron daruak iha plenária, Parlamentu Nasionál, tersa ne’e.
Entretantu iha livru 3C (RAEOA-ZEESM), ne’ebé Arsénio Bano aprezenta ba Parlamentu Nasionál prevee mós rúbrika keta-ketak ida ho naran Fundu Espesiál Dezenvolvimentu (FED) ho montante $14,000,000.00 ba ezekuta hodi finaliza konstrusaun Ró Haksolok.
Bazea ba livru 3C (RAEOA-ZEESM) previstu iha $127,000,000 ba 2021 ne’ebé koloka ba saláriu vensimentu $11.072.049,00, bens servisu $23.775.569,00, kapital minór $2.360.470,00, kapitál dezenvolvimentu $85.506.102,00 no transferénsia públika $4.285.810,00.
Saláriu vensimentu
Despeza ba kategoria saláriu vensimentu hamutuk $11,072,049 hodi asegura saláriu no oras estraordináriu ba funsionáriu hamutuk ema na’in-2,475 ne’ebé dezagrega iha gabinete prezidente autoridade, adjunta prezidente autoridade hodi reforsa institusionál, adjuntu prezidente autoridade ba asuntu sosiál no sekretária rejionál na’in-7 iha RAEOA no ZEESM.
Bens servisu
Nune’e mós despeza ba kategoria bens servisu $23,775,569.00 hodi asegura kustu operasionáll ba gabinete prezidente autoridade, adjuntu prezidente autoridade no sekretáriu rejionál sira hodi implementa programa ka atividade iha RAEOA no ZEESM-TL.
Kapitál minór
Entretantu, kapitál minór hamutuk $2,360,470.00 ba tinan 2021 atu asegura kondisaun bázika ba Gabinete Prezidente Autoridade no Gabinete Sekretária rejionál sira ba sosa karreta ambulánsia, kareta tanki bee-moos, karreta operasionáll, komputador/laptop, printer, mákina fotokopia, mobiliáriu, AC no seluk tan.
Kapitál dezenvolvimentu
Purtantu kapitál dezenvolvimentu hamutuk $85,506,102 ba 2021, hosi montante refere, RAEOA no ZEESM-TL prevee orsamentu $56,262,790 hosi likides própriu no Governu Sentrál sei aloka montante $29,243,312 mai hosi fundu petrolíferu hodi finánsia no asegura obras sira-ne’ebé la’o hela nomoos ba obra foun tuir prioridade VIII Governu Konstitusionál nian.
Transferénsia públika
Iha parte transferénsia públika hamutuk $4,285,810.00 hodi asegura kustu ne’ebé ho natureza subvensaun públikas. Liña rúbrika ida-ne’e nu’udar responsabilidade tomak ba Prezidente Autoridade hola desizaun ba despeza.
Fundu espesiál dezenvolvimentu
Proposta RAEOA nian ba 2021 previstu tán kategoria ida ho naran Fundu Espesiál Dezenvolvimentu (FED) ho montante $14,000,000.00 ba ezekuta hodi finaliza konstrusaun Roo Haksolok.
“Ho nune’e bele fó retornu finanseiru mai iha RAEOA no ZEESM-TL. Orsamentu ba FED ho valor millaun $14 engloba ona iha kategoria kapitál dezenvolvimentu,” refere livru 3C (RAEOA-ZEESM), ne’ebé hetan asinatura hosi Ministra Finansa Interina atuál Vise-Ministra Finansa, Sara Lobo Brites.
Entretantu proposta orsamentu $14,000,000 ne’e hosi $85,506,102 ne’ebé previstu iha kategoria orsamentu kapitál dezenvolvimentu RAEOA nian.
Jornalista: Evaristo Soares Martins
Editór: Cancio Ximenes
