Koordenadór Nasionál Rede ba Rai, Horténcio Pedro Vieira. Imajen TATOLI/Osória Marques.

DILI, 01 dezembru 2020 (TATOLI)—Koordenadór Nasionál Rede ba Rai, Horténcio Pedro Vieira, hateten Governu presiza dezenvolve lejislasaun no polítika rai-ne’ebé forte no tuir kontestu lokál Timor-Leste (TL)  tanba asuntu rai kompleksu no sensitivu tebes.

Koordenadór ne’e hateten, to’o agora susar atu implementa lei hirak ne’e tanba sei hein hela diploma komplementár 18 atu kompleta liután lei prinsipál ne’e.

Tuir nia, OJE 2021, Ministériu Justisa (MJ) deskreve planu atu dezenvolve restante diploma komplementár maibé importante mak lei ne’e dezenvolve ho forte, bazea ba evidénsia no iha konsultasaun ne’ebé kle’an.

“Tanba iha dezenvolvimentu lejislasaun mak menus partisipasaun hosi komunidade, ne’e bele lori fallaansu ba lejislasaun nia implementasaun no mós dezenvolvimentu programa sira,” Koodenadór ne’e hateten ba jornalista sira iha salaun FONGTIL, Caicoli, Dili, tersa ne’e.

Nia mós konsidera Lei no polítika ne’ebé kontra kontestu lokál no la bazea ba prátika di’ak, bele rezulta tensaun sosiál, hanesan halo despezu ka hasai ho forsa ba ema no hela fatin informál, komunidade lakon direitu ba rai no la hatene kona-ba sira-nia direitu.

Nia hatutan, dezenvolvimentu ba lei forte la’ós bazea ba matenek jurídiku maibé dezenvalvimentu ba lei no polítika kona-ba asuntu rai presiza mós evidénsia forte iha área siénsia sosiál, kulturál, ekonómiku no agrikultura.

“Tanba ne’e, presiza bazea mós ba evidénsia forte hosi nasaun seluk no prátika di’ak hosi nível internasionál. Ho razaun hirak ne’e, Rede ba Rai rekomenda ba Parlamentu Nasionál (PN) atu aloka orsamentu ne’ebé sufisiente ba MJ, nune’e bele asegura konsultasaun públiku ne’ebé kle’an no partisipativa kona-ba lejizlasaun, diploma no polítika liga ho asuntu rai nian,” nia rekomenda.

Atu Implementa projetu sira, Horténcio hateten, Governu presiza obedese ba prinsípiu no padraun iha lei ekspropriasaun ba OJE 20211, tanba Governu planeia atu implementa projetu dezenvolvimentu oioin ne’ebé sei harii iha rai nia leten.

“Projetu balun sei presiza uza rai ne’ebé agora daudaun povu uza hela. Tanba ne’e, presiza asegura prosesu foti rai ne’ebė justu, legál no la fó ameasa ba povu nia direitu,” Horténcio esplika.

Nia fó hanoin katak iha 2017, Prezidente Repúblika promulga no tama ein vigór ona lei espropriasaun (lei 8/2017). Lei ne’e ko’alia kona-ba regula Governu bainhira atu foti ema koletivu ka individuál nia rai atu uza ba interese públiku ruma. Entaun, nia dehan, lei ne’e bele ajuda Governu tanba iha esplikasaun klaru kona-ba prosedimentu no mekanizmu sira.

Entretantu, prosedimentu no mekanizmu hanesan halo konsultasaun ba públiku ho ninia lala’ok espesífiku, avaliasaun ba impaktu sosiál no ambientál, prosesu planeamentu projetu ne’ebé klaru no Governu tenke asegura asisténsia legál ba komunidade afetadu inklui asegura reabilitasaun no indeminizasaun ne’ebé apropriadu. Ikus liu, tenke asegura ajuda espesífiku ba ema vulnerável sira.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here