Primeiru-Ministru, Taur Matan Ruak, hamutuk ho membru Governu sira defende Proposta OJE 2021 iha debate faze jeneralidade, iha sala plenária. Imajen TATOLI/Egas Cristovão

DILI, 01 dezembru 2020 (TATOLI)--VIII Governu Konstitusionál iha kompromisu kapitaliza Banku Nasionál Komérsiu Timor-Leste (BNCTL,sigla Portugés) no Banku Sentrál Timor-Leste (BCTL, sigla portugés) hodi fasilita  empréstimu ba timor-oan, liuliu setór privadu  atu estimula ekonomia, hamenus dezempregu no harii dalan ne’ebé di’ak liu ba kreximentu ekonómiku no reziliénsia.

“Ita-nia banku sira presiza iha rekursu sufisiente atu kontinua fó empréstimu atu kréditu kontinua suli ba ekonomia tomak, tanba ema hotu hakarak atu ita-nia sistema bankáriu tenke reziliente, atubele uza kapitál ho objetivu atu halo i ekonomia sai forte liután,” Primeiru Ministru (PM), Taur Matan Ruak, afirma iha debate loron daruak Orsamentu Jerál Estadu (OJE) 2020 iha faze jeneralidade, iha sala plenária, Parlamentu Nasionál (PN), tersa ne’e.

Tuir Xefe Governu dehan, lójikamente polítika fó empréstimu ba ema no empreza sira atu evita individu no empreza sira labele monu ba falénsia no sei estimula ema no empreza sira atu foti empréstimu hodi sustenta kompra, traballadór no investimentu, ne’ebé sei aumenta prokura atu hafila kontrasaun ekonómika.

Nune’e, iha OJE 2021, Governu halo kapitalizasaun  ba Banku Nasionál Komérsiu Timor-Leste no Banku Sentrál Timor-Leste millaun $50.

“Tuir ami-nia hanoin, importante atu kapitaliza Banku Nasionál Komérsiu Timor-Leste millaun $40 no Banku Sentrál Timor-Leste millaun $10, tanba banku sira tenke reziliénte iha eventu ne’ebé kauza hosi COVID-19 no resesaun eknomia,” nia akresenta.

Ho polítika kapitalizasaun ne’e, Governu atomista bele alkansa gañu produtividade no kriasaun empregu ho polítika sira seluk ne’ebé bele apoia dezenvolvimentu setór produtivu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here