Prosesu aprendizajen iha sala aula estudante EBF Eraulo nú.230. Imajen TATOLI/António Gonçalves

DILI, 01 dezembru 2020 (TATOLI)--VIII Governu Konstitusionál prevee  orsamentu tinan  fiskál 2021 ho montante millaun $111,4 atu mellora sistema edukasaun no infraestrutura atu dezenvolve pontesiál umanu iha Timor-Leste.

Apoia investimentu iha edukasaun hanesan komponente importante husi Orsamentu Estadu nian (OJE) 2021. Orsamentu Ministériu Edukasaun nian sa’e ba millaun $111,4, ne’ebé korresponde 5% hosi totál Orsamentu Estadu nian,” PM Taur dehan iha ámbitu debate loron daruak Proposta OJE 2021 iha faze jeneralidade, iha sala plenária, Parlamentu Nasionál (PN), tersa ne’e.

Hosi orsamentu ne’e, millaun $78,4 maka investimentu ba pré-eskola no edukasaun bázika atu kondús potensiál umanu no hametin kondisaun iha futuru hanesan foin-sa’e, adultu no sidadaun  produtivu liuhosi partisipasaun ativa iha dezenvolvimentu sustentável no konstrusaun nasaun.

Entertantu, millaun $3 sei finansia infraestrutura pré-eskola, millaun $17,9 ba infraestrutura edukasaun bázika, millaun $4 maka finansia Sentru Aprendizajen no Formasaun Eskolár (CAFÉ, sigla portugés) no millaun $44,9 atu uza selu profesór hosi edukasaun bázika no funsionáriu sira seluk.

“Atu koloka ida-ne’e, Governu iha perspetiva tuir evidénsia sientífika resente hosi Fundu Nasaun Unida ba Labarik (UNICEF, sigla inglés), ba kada dolar ne’ebé ita gasta iha edukasaun pré-primária, ita hetan filafali $9 ne’ebé benefisia ba sosiedade. Ho aumentu ida-ne’e pelumenus ita sei hasa’e númeru matríkula iha edukasaun bázika ba pontu 96%,” nia akresenta.

Nune’e, besik millaun $24,9 sei aloka ba apoiu ensinu sekundáriu, ne’ebé inklui millaun $10,4 iha infraestrutura atu permite ambiente aprendizajen ne’ebé adekuadu no millaun $12 atu selu profesór no funsionáriu sira.

“Ita sei foka ba investimentu sistema ensinu superiór atu kontinua promove kualidade no asesu. Besik millaun $26,4 maka ita propoin ba setór ida-ne’e, ne’ebé inklui millaun $6,3 ba Ministériu Ensinu Superiór no millaun $20,1 ba Universidade Nasionál Timor-Lorosa’e (UNTL),” PM Taur informa.

Investimentu ne’e, tuir Xefe Ezekutivu ho objetivu atu mantein serbisu ba estudante sira atu iha kapasidade halo peskiza no halo investigasaun sientífika.

“Intervensaun Governu  sei tulun no garante katak 50% hosi universidade sira maka bele hetan akreditasaun, katak estudante bolseiru hamutuk 1.350 iha rai-li’ur hetan susesu iha dezempeñu eskolár, investigasaun prioritária ba país konklui ona iha área sistema agro-produsaun, agro-ekonomia no direitu ne’ebé relasiona ho kultura no tradisaun Timor-Leste nian,” PM subliña.

Governu hakarak atu forma médiku, enfermeira no parteira 170, profisionál ekonomia no jestaun 263, profisionál siénsia sosiál 158 no advogadu 26.

“Fundu infraestrutura sei finansia millaun $4,8 atu halo hotu Eskola Pólu Foun iha Baucau no fó prioridade ba konstrusaun Institutu Politékniku iha Aileu no iha Betano, no Sidade Universitária foun iha Aileu,” nia realsa.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here