Diretór Jerál Ministeriu Soliedariedade Sosial no Inkluzaun (MSSI), Rui Manuel Gago Exposto. Imajen/Nelson Sousa

DILI, 01 dezembru 2020 (TATOLI)—Benefisiáru na’in-18 ne’ebé uluk simu ona osan ba subsídiu $200 hosi fundu COVID-19 ne’e, entrega fila-fali ona osan agregadu familiar $200 ba Governu liuhosi Ministériu Solidaridade Sosiál no Inkluzaun (MSSI) hamutuk $3,600.

Notísia Relevante: Benefisiáriu 148 tenke devolve subsídiu agregadu familiár

Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto, hatete hosi benefisiáriu na’in-18 ne’e, na’in-hitu liuhosi MSSI no na’in-11 entrega liuhosi konta suku nian, hamutuk $3,600.

“Ema na’in-hitu mak entrega ona osan agregadu familiár $200 ba MSSI no balun ba CAC mak CAC entrega fali osan ba MSSI tanba sira sente sira-nia aan la merese atu simu osan ne’e. No, restu ne’e hatama direta ba konta bankária suku nian,” Rui Gago hateten ba Agencia TATOLI iha nia servisu fatin, Caicoli, Dili, foin lalais ne’e.

Rui Gago hateten, osoan montante $1,400 mak liuhosi MSSI no $2,200 hosi konta bankária suku nian. Nia dehan, bainhira MSSI halo rekonsiliasuan mak foin deteta osan hirak ne’e, maibé antes ne’e nia rasik la hetan ka la simu informasaun hosi autoridade komunitária sira kona-ba benefisiáriu sira-ne’ebé mak fó fila osan.

“Tanba ami haree, rekonsilia no deteta katak iha osan aumentu purvolta $2,200, signifika ema hamutuk 11 mak hatama ona osan. Bainhira Autoridade Komunitária mak depozita osan ne’e, bainhira sira depozita osan, klaru osan ne’e tenke ba iha fundu COVID-19 nian,” nia dehan.

Maibé, tuir nia, antes ne’e ekipa konjunta hosi Comissão Antí Corrupção (CAC) ho Provedoria Direiru Umanu no Justisa (PDHJ) no Komisaun Funsaun Públika (CFP) husu ba benefisiáriu sira atu devolve fila osan, tanba la prenxe kritériu tuir dekretu lei apoiu monetáriu ba agregadu familiar.

Liuhosi rezultadu monitorizasaun no akompañiamentu ekipa konjunta iha ámbitu ezekusaun subsídiu $200 iha territóriu nasionál, deskobre katak benefisiáriu na’in-148 mak la prenxe kritériu, nune’e iha obrigasaun tuir lei tenke entrega fila-fli osan ba Estadu.

Entretantu, nia dehan, fulan rua liubá MSSI hatama ona proposta ida ba Ministériu Finansa (MF) kona-ba kria konta bankária ida, nune’e benefisiáriu sira-ne’ebé la elizível mak simu ona osan ne’e ba hatama fali.

“Ami husu MF atu kria konta bankária ida iha BNCTL para depois sira bele re-depozita fali osan, maibé to’o agora ha’u sieduak hetan rezultadu hosi proposta refere,” nia hateten.

Diretór ne’e subliña katak, pedidu refere ne’e atu hafasil benefisiáriu sira hatama osan no parte relevante mós bele kuida di’ak.

Jornalista: Osória Marques

Editór: Cancio Ximenes

 

HAKEREK NO HATÁN

Please enter your comment!
Please enter your name here