Imajen Espesiál.

DILI, 01 dezembru 2020 (TATOLI)—Bankada Congresso Nacional da Reconstrução de Timorense (CNRT) kestiona alokasaun hosi proposta-lei Orsamentu Jerál Estadu (OJE) 2021 ba kategoria kapitál dezenvolvimentu kiik liu kompara ho kategoria sira seluk.

Notisia Relevante: Proposta foti millaun $830 fó ameasa ba sustentalidade fundu minarai

Deputada Bankada CNRT. Virgínia Ana Belo. Imajen/Cipriano Colo.

“Ha’u hakarak haree kualidade no estrutura orsamentu, distribuisaun proposta OJE 2021 iha nível kategoria agregadu hatudu katak despeza rokorente hanesan saláriu no vensimentu, bens no servisu no transferénsia públika maka hetan alokasaun orsamentu boot liu ho valór totál biliaun $1.349 (61%) kompara ho despeza kapitál minór no kapitál dezenvolvimentu, ne’ebé hetan de’it alokasaun millaun $535 (28%),” Deputada Virgínia Ana Belo, levanta liuhosi debate jeneralidade loron daruak, iha plenária Parlamentu Nasionál, tersa ne’e.

Proposta OJE 2021 hamutuk biliaun $1.895 komposta hosi saláriu no vensimentu millaun $239,26, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

“Orsamentu ida atu dehan kualidade bainhira atribuisaun barak liu iha investimentu do que iha rekorente tanba iha rekorente ne’e iha tendénsiu liu ba konsumu,” Eis Prezidente Komisaun D (Ekonomia no Dezenvolvimentu) ne’e fó hanoin ba Governu.

Deputada Virgínia Ana Belo, ejize Governu atu halo esplikasaun kle’an ba orsamentu boot ne’e hodi hasai resesaun eonomia -6% iha 2020.

“Atu kria kampu servisu ne’e hira, mai hosi ne’ebé, indústria ka setór ida-ne’ebé, atu hatama fali reseita ba Estadu ne’e hira,” Deputada Bankada CNRT ne’e hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here