Primeiru-Ministru, Taur Matan Ruak, hamutuk ho membru Governu sira defende Proposta OJE 2021 iha debate faze jeneralidade, iha sala plenária. Imajen TATOLI/Egas Cristovão

DILI, 01 dezembru 2020 (TATOLI)–Iha tinan 2021, VIII Governu hakarak dezenvolve setór turizmu no agrikultura atu fó retornu ekonómiku ba Timor-Leste.

Primeiru-Ministru (PM), Taur Matan Ruak, hateten presiza dezenvolve polítika turizmu hodi identifika potensiál kreximentu fatin ida-idak ne’ebé posível ho objetivu atu promove Timor-Leste hanesan destinu turístiku iha Ázia Pasífiku.

“Objetivu hosi polítika no investimentu ne’e atu promove no dezenvolve setór agríkola no turizmu hanesan motór prinsipál ba transformasaun estruturál ekonomia,” PM Taur hateten iha debate loron daruak Orsamentu Jerál Estadu (OJE) 2020 iha faze jeneralidade, iha sala plenária, Parlamentu Nasionál (PN), tersa ne’e.

Aleinde ne’e, atividade merkadu oioin hanesan feira no espozisaun sei prevee iha orsamentu ba turizmu ne’ebé disponibiliza maka millaun $11,9.

Xefe Ezekutivu nota katak agrikultura iha Timor-Leste to’o oras ne’e, ninia dezempeñu kiik liu hosi ninia potensiál, tanba ne’e sei la prodús loloos valór ba ekonomia no pezu agrikultura iha produtu internu brutu nia laran ki’k liu 1% hosi Produtu Internu Brutu (PIB).

Vizaun estratéjika Governu maka foka liu ba ai-han, agrikultura moderna no sustentável ne’ebé orientadu ba merkadu Timor-Leste, ho redusaun moris-kiak iha área rurál inklui hadi’a kualidade no moris di’ak timor-oan sira iha agrikultura, peska no pekuária.

Sistema agríkola ne’ebé produtivu no diversifikadu liu bele hadi’a nutrisaun no moris-di’ak povu timor-oan nian.

Tanba ne’e, iha OJE 2021 prevee ba Ministériu Agrikultura no Peska (MAP) hamutuk millaun $31,9 atubele hahú halais transformasaun agríkola hodi apoia potensiál produtivu no esportadór produsaun florestál, kultura rendimentu, kultura ai-han no kultura bee.

Nune’e, Planu Rekuperasaun Ekonómika fó prioridade troka kafé hun tuan sira ho hun kiik ho téknika foun, hodi hasa’e produtividade no kualidade esportasaun no bele impulsiona produsaun florestál hodi aumenta renda agrikultór sira.

Intensifika pekuária atu hadi’a dieta populasaun, kria insentivu diretu ba produsaun no komersializasaun produtu  hanesan foos, batar, koto, forekeli no ai-farina, inklui ativasaun no espansaun esplorasaun akuikultura ne’ebé haree liu ba kriasaun tilápia hodi permite no apoia setór privadu hodi dezenvolve merkadu ne’e.

Aleinde ne’e, Governu mós atu apoia transformasaun no setór agríkola ne’ebé maka diversifikadu liután.

Orsamentu Estadu prevee finansia modernizasaun, industrializa no aumentu produtividade agríkola millaun $16,8, ne’ebé aloka ba MAP.

Durante tinan 2021, orsamentu ba agrikultura ninia objetivu maka kontribui ba transformasaun estruturál, liuhosi dezenvolvimentu infraestrutura (operasaun sistema irigasaun no konstrusaun instalasaun akuikultura), abastesimentu bee, armazenamentu no transformasaun atu apoia agrikultór, aumenta produsaun animál (apoiu ba hakiak bibi, bibi-malae no vaka ba susubeen, ba produsaun fahi no manu lokál no vaka hirak ne’ebé ho rasa di’ak liu), aumentu produsaun produtu seluk (foos, batar, ortikultura, kafé).

Aumenta asesu ba merkadu no kadeia valór liuhosi estruturasaun empreza agríkola ne’ebé opera iha kadeia valór agronegósiu iha rai-laran, apoiu ba dezenvolvimentu plantasaun komersiál sira no ai-kameli, aproveitamentu oseanu, tasi no rekursu tasi ba dezenvolvimentu sustentável, no investimentu iha setór florestál (ai-kameli, ai-saria, ai-teka, ai-mahoni no ai-hanek).

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here