Ekipa Femenina BCTL sai primeiru lugar ba taxa MAPCOMS. Imajen/Espesial.

DILI, 29 novembru 2020 (TATOLI)—Jogu finál tasa Ministériu Assuntu Parlamentár no Komunikasaun Sosiál (MAPCOMS-sigla Portugeza) tinan 2020 entre ekipa feminina Tatoli ho ekipa feminina Banco Central de Timor-Leste (BCTL) ne’ebé realiza iha Kampu Futebol Salaun, Bebora, lori ekipa feminina BCTL sai primeiru lugar no ekipa feminina Tatoli sai segundu lugar.

Iha jogu primeira parte, iha minutu primeiru, ekipa BCTL ne’ebé lidera hosi kapitaun Juviana T. Rosangela (5) halo kontra atake maka’as hodi ameasa beibeik baliza ekipa Tatoli no konsege hatama golu bainhira jogu foin halao iha minute rua (2) nia laran.

Ekipa Femenina TATOLI sai segundu lugar. Imajen/Espesial.

La kle’ur de’it, tanba atake makaas, mak iha minutu lima (5) jogadora Elda Soares (20) hosi BCTL konsege hatama tan golu ida ne’ebe halo guarda rede Imelda D (20) hosi ekipa Tatoli tenke dad iis naruk. Ho golu rua tutuir malu ne’e, ekipa Feminina Tatoli kontinua halo kontra ataka ba ekipa BCTL liuhosi kapitaun, Maria Auxiliadora, pasa bola ba Celestina X (10) dala rua tutuir malu, maibé la konsege hatama golu.

Joga la’o seidauk kleur tan, ekipa BCTL liuhusi jogadora Juviana Lebre (7) hatama tan golu ida hodi aumenta score 3-0 to’o jogu primeira parte ramata.

Tanba sente domina bola makaas mak bainhira tama ba segunda parte, iha minutu 12, jogadora Rosangela Boavida (26) marka tan golu ida hodi muda score 4-0. Liu deit munutu ida, iha minutu 13, jogadora Alexandrina Bareto Martins hatama tan golu ida hodi muda score 5-0.

Maske ekipa Tatoli han golu barak ona maibé ekipa tatoli liuhosi jogadora Celestina X (10), iha minutu 16, konsege responde halo golu ida hodi muda score 5-1. Ho golu ida ne’e mak fanu Kapitaun ekipa feminina Tatoli, Maria Auxiliadora (7), nia espiritu hodi hatama tan golu rua tutuir malu iha minutu 18 no 19, ho nune’e jogu segunda parte ramata ho score 5-3 no lori ekipa BCTL sai primeiru lugar.

Ekipa feminina ne’ebé mak hetan terseiru lugar mak ekipa femenina Ministérius Obra Publika (MOP) ho valor osan $400, ekipa femenina Tatoli hetan segundu lugar ho $600, no ekipa femenina BCTL ne’ebé sai primeiru lugar hetan osan $800 ho taxa no simu medalla.

Jornalista: Domingos Piedade Freitas

Editór: Cancio Ximenes

HAKEREK NO HATÁN

Please enter your comment!
Please enter your name here