Sekretáriu Estadu Ambiente, Demétrio do Amaral de Carvalho. Imajen TATOLI/Egas Cristovão

DILI, 30 novembru 2020 (TATOLI)—Sekretaria Estadu Ambiante (SEA) liuhosi Ajénsia Naionál Lisensiamentu Ambientál  (ANLA) hamutuk ho Sekretaria Estadu Protesaun Sivíl (SEPS) halo sensibilizasaun ba indústria tempe no tahu, hodi kontribui ba jestaun no risku abientál ne’ebé di’ak iha futuru.

Inisiativa ne’e tanba nota katak iha inspesaun hatudu indústria ezistente, balun la konstribui ba jestaun ambientál bainhira halo produsaun tempe no tahu, ne’ebé bele fó impaktu negativu ba komunidade.

Sekretáriu Estadu Ambiante, Demétrio do Amaral de Carvalho, hateten workshop ne’e hakarak sensibiliza impaktu produsaun indústria tempe no tahu ne’ebé iha armajen, bainhira liga ho jestaun ambientál, nune’e  produtór bele hatene halo jestaun no labele fó  prejuízu ba ambiente, ema no Estadu.

“Ita hatene atividade indústria rua ne’e ba ema moris kiik nian, maibé ninia impaktu  presiza konsidera.  Tanba ne’e, atividade ohin atu hadi’a produtór sira-nia perspetiva atu kompreende prosedimentu atu aplika no trata lisensa,” Sekretáriu Estadu Démetrio dehan iha abertura workshop organiza hosi ANLA,  iha Tower, Fatuhada, segunda ne’e.

Tuir ezekutivu ne’e, ba indústria tempe no tahu, dahuluk presiza trata lisensa ambientál, tanba estudu hatudu katak indústria hirak ne’e poténsia fó risku ba ambiente.

Daruak, iha planu jestaun ba ambiente, tanba faze ne’e maka bele sai mata dalan ba produtór no autoridade ambientál hodi halo inspesaun no kontrola.

“Iha Timór, ita iha evidénsia forte ba dezastre balun ne’ebé kauza hosi planu ladún di’ak, jestaun ladiak,  hanesan ai-han iha armajen  ida, ne’ebé iha laran iha ai-moruk no kombustível, bele fó impaktu ambientál,” nia esplika.

Governante ne’e haktuir, iha tempu hirak liubá ahi han postu kombustível, ne’ebé ninia risku la’ós de’it ba na’in ba kompañia maibé armajen materiál sira mós kona impaktu.

“Bele mós fó prejuízu ba públiku no Estadu, tanba ne’e ita alerta empreza sira hotu ne’ebé iha armajen iha Dili laran ka iha fatin seluk  iha territóriu Timór laran, tenke hatene mekanizmu halo jestaun ba armajen tuir padraun. Bainhira sasán ruma iha risku, ita halo oinsá? ne’e tenke tama planu jestaun,” nia akresenta.

Iha fatin hanesan, Reprezentante  SEPS, Claúdio Ximenes, hateten prezensa Sekretaria Estadu ne’e atu hamutuk sensibiliza kestaun  liga ba protesaun sivíl.

Tuir nia, papél protesaun sivíl importante tebes ba sosiadade, tanba  ne’e maka  liuhosi atividade ne’e bele partilla buat balun relasiona kondisaun protesaun nian.

“Atividade ne’e importante atu partilla ba produtór sira hotu, ne’ebé prodús ai-han hanesan tempe no tahu, ne’ebé iha armajen tenke kuidadu bainhira halo produsaun, jestaun tenke di’ak hodi kontribui ba ambiente saudável no labele fó impaktu ba ema seluk,” nia fó hanoin.

Nune’e mós, na’in ba produsaun tempe no Tau iha Beto, Teresa dos Santos, garante produsaun tempe no tahu ne’ebé sira iha dook hosi komunidade no la fó risku ba ambiente.

“Durante  ne’e, ami halo jestaun produsaun di’ak tebes, tempe ne’e la iis, tahu mak iis maibé la afeta ba komunidade tanba ami halo nia jestaun di’ak”, dehan nia.

Nia dehan, ekipa hosi SEA haree ona fatin produsaun, maski iis maka’as  maibé la afeta ba komunidade.

Entretantu, workshop ne’e rasik  hetan parsipasaun másimu hosi na’in indústria tempe no tahu, inklui atividade ekonómika ne’ebé iha armajen.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here