DILI, 30 novembru 2020 (TATOLI)–Sekretáriu Estadu Ambiante (SEA), Demétrio do Amaral de Carvalho, hateten durante ne’e rejista kazu krime ambientál rua.
“Iha kazu krime rua, agora iha komersializasaun no armajen ne’ebé ahi han foin daudaun ne’e,” Sekretáriu Estadu Demétrio dehan hafoin halo abertura workshop ne’ebé organiza Agência Nasionál Lisensiamentu Ambientál (ANLA), iha Tower, Fatuhada, segunda ne’e.
Nia dehan, krime ambientál akontese bainhira ema kaer no fa’an manu fuik sira iha dili laran.
“Ita kaer kona no hetan evidénsia komersializa hela manu ne’ebé ita proteje, ita bele halo atuasaun imediata,” nia akresenta.
Tuir governante ne’e, fásil atu entrega infratór sira ba Polísia no Ministériu Públiku hodi halo prosesu.
“Ita tenta atu sensibiliza públiku tomak katak ita ninia kódigu penál artigu 15 define kona-ba krime abientál hosi sasán kiik no halo prejuízu ba ambiente ne’e konsidera hanesan krime ambientál,” nia subliña.
Jornalista: Natalino Costa
Editora: Julia Chatarina
