Edukasaun fizika no Desportu. Ilustrasaun

DILI, 30 novembru 2020 (TATOLI)—Diresaun Nasionál Alta Kompetisaun husi Sekretáriu Estadu Juventude no Desportu (SEJD), segunda ne’e, fó ona formasaun kona-ba edukasaun fizika no desportu ba profesór  hamutuk 25 husi eskola ensinu báziku iha Kapitál Dili.

Diretór Nasional Alta Kompetisaun, João Rodrigues, informa formasaun ne’e, ho objetivu maka atu halo diagnóstika ba sistema dezenvolvimentu edukasaun fizika no desportu iha rai-laran, liliu liga ba polítika desportu eskolár no komunitária.

Notísia Relevante :Governu diskute planu implementasaun desportu eskolár  

“Kuandu rua ne’e mak ita la organiza ita sei la hatudu prestasaun buat ida iha edukasaun fizika no desportu ne’e rasik, tan ne’e, ita simu orientasaun husi SEJD nian hodi halo virajen bo’ot ida ba nivel báziku,”dehan nia ba jornalista sira iha salaun Fundasaun Oriente Bairro dos Grilhos, segunda ne’e.

Formadór ne’e dehan, materia formasaun ne’e foka liu ba tékniku no regra desportu atu oinsá sai matadalan hodi implementa ba eskola nivél báziku sira iha tinan 2021 nune’e bele dezenvolve desportu iha Timor-Leste.

“Ita hala’o formasaun ne’e ba profesór desportu sira atu nune’e bele mós lori labarik bele sente desportu ne’e sai hanesan nesesidade ba sira iha eskola ensinu báziku to’o ensinu superior,” tenik tan.

Notísia Relevante :SEJD Sei Estabelese Institutu Nasionál Desportu

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here