DILI, 30 novembru 2020 (TATOLI)—Prezidente Parlamentu Nasionál, Aniceto Longuinhos Guterres Lopes, husu deputadu sira atu halo diskusaun kle’an ho Governu ba proposta-lei Orsamentu Jerál Estadu (OJE) ba tinan fiskál 2021.
Notísia Relevante: PN sei debate OJE 2021 iha 30 novembru
Tuir nia, proposta-lei ba tinan fiskál 2021 diferente ho orsamentu sira uluk nian tanba orsamentu ida-ne’e baze ba kada programa.
“Tanba ne’e presiza Parlamentu Nasionál hamutuk ho Governu atu haree no tetu didi’ak liuhosi dsikusaun kle’an, tranku, abertu no ho dignidade antes orsamentu ne’e hetan aprovasaun ikus,” Prezidente Parlamentu Nasionál fó hanoin ba deputadu sira bainira hala’o abertura ba debate jeneralidade loron dahuluk ba proposta-lei no 23/V (3a)-Orsamentu Jerál Estadu ba tinan fiskál 2021, iha plenária, Parlamentu Nasionál, segunda ne’e.
Proposta-lei OJE ba tinan fiskál 2021 hamutuk biliaun $1.895 kompostu hosi saláriu no vensimentu millaun $239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.
Iha Planu Anuál Governu nian 2021 reflete kontinuasaun traballu reforma jestaun finansa públika, ne’ebé inisia susesivu Governu nian liuhosi Roteiru orsamentasaun kada programa.
Tinan fiskál 2021 hanesan tinan finanseiru dahuluk ba departamentu hotu-hotu, institutu no entidade públika sira iha governu implementam orsamentu kada programa.
Bazea livru 2 (planu anuál) deskreve iha OJE 2021 integra programa hamutuk 141, sub-programa 431 no totál atividade hamutuk 1,837.
Kuadru Planeamentu kona-ba orsamentasaun kada programa bazea ba Planu Estratégiku Dezenvolvimentu (PED) 2011-2030 no Objetivu Dezenvolvimentu Sustentável (ODS 2030), hanesan dokumentu estratéjiku no dokumentu polítiku.
Jornalista: Evaristo Soares Martins
Editór: Cancio Ximenes