Diskusaun proposta OJE 2021 iha sala plenária Parlamentu Nasionál. Imajen TATOLI/Egas Cristovão

DILI, 30 novembru 2020 (TATOLI)–Primeiru-Ministru (PM), Taur Matan Ruak, konsidera Orsamentu Jerál Estadu (OJE) 2021 atu fó resposta ba dezafíu ne’ebé Estadu enfrenta iha tinan 2020.

“Governu formula orsamentu ne’e atu revitaliza ekonomia, proteje no investe iha povu no fó ba joven sira oportunidade hodi integra iha sosiedade nia le’et atu realiza sira-nia mehi,” Xefe Govenu afirma iha ámbitu diskusaun loron dahuluk Proposta OJE 2021 faze jeneralidade, iha sala plenária, Parlamemntu Nasionál (PN), segunda ne’e.

Dokumentu orsamentu 2021, kontein livru orsamentu hamutuk 9 ne’ebé la hanesan, sai pájina besik 1.500 no deskreve despeza planeada hosi entidade oin-oin hosi ministériu, sekretaria estadu no instituisaun públika hamutuk 91, ho atividade 1.800 resin ne’ebé la hanesan maka orsamenta ona.

Notísia Relevante: Governu submete ona Proposta Lei OJE 2021 ba PN

“Formatu orsamentu 2021 muda maka’as tanba abordajen orsamentál bazeia ba programa, ne’ebé sei garante jestaun di’ak hosi rezultadu no dezempeñu, ne’ebé aloka ho forma efisiente liután ba rekursu públiku sira-ne’ebé oituan de’it, tantu agora no mós aban bainrua,” nia esplika.

 Aleinde ne’e, Governu sei toka ba kontestu ho justifikasaun kona-ba desizaun prinsipál ne’ebé halo liuhosi orsamentu.

Xefe Ezekutivu rekoñese, tinan 2020 hamosu dezafíu barak, dezde ukun-an, hahú hosi dezastre naturál iha fulan-marsu no ikus mai pandemia COVID-19 inklui impase polítika ne’ebé naruk, maibé nasaun iha forma no susesu atu nafatin serbí povu.

“Governu no ita, hanesan povu no nasaun, hasoru COVID-19 ho forma desiziva no efikáz, maibé ita ho lalais bele mobiliza millaun $220-resin, inklui millaun $92 ba medida imediata atu fó resposta ba ekonomia. Ho planeamentu no rapidéz, ne’ebé antes ne’e nunka akontese, ita dezenvolve unidade atendimentu emerjénsia, harii sistema kuarentena, teste, rastreiu no lokalizasaun ida,” nia hatutan.

Ho forma signifikativa, Governu mós konsege haforsa sistema saúde no apoiu ba profisionál saúde inklui funsionáriu sira ne’ebé serbisu iha liña oin.

“Ita-nia Governu no Parlamentu Nasionál ho brani foti desizaun iha tempu  badak, no ita proteje fronteira sira,  ita-nia povu unidu, timor-oan sira uza máskara, fase liman no mantein distansiamentu sosiál,” Xefe Governu louva.

Iha ámbitu pandemia globál, Governu mós konsege aprova lei no regulamentu hamutuk 18, hodi garante resposta ba COVID-19.

Iha loron balun hafoin kriasaun Estadu Emerjénsia, implementa subsídiu eletrisidade no bee moos fornese ho gratuita.

“Ita prienxe filafali abastesimentu ai-han emerjénsia, mantein konetividade internasionál liuhosi Darwin hodi mantein movimentu abastesimentu no espesialista sira, uma-kain besik 300.000 maka simu transferénsia $200 ho karaktér universál, pagamentu subsídiu salariál, tulun estudante iha rai-li’ur ho subsídiu no ita estimula produsaun agríkola,” Taur haktuir.

Governu konsidera, medida estabilizasaun bele proteje ona família ne’ebé lakon rendimentu, monu ba kiak, no dezempregu inklui ajuda ona empreza sira sustenta ninia fluxu kaixa no mantein traballadór sira bele serbisu nafatin.

Aleinde resposta imediata ne’e, iha loron 12 agostu, Governu aprova ona pakote Rekuperasaun Ekonómika, ne’ebé hatuur medida ba prazu badak no médiu hamutuk 71, sei implementa entre tinan 2021 to’o 2023.

“Planu ne’e ninia objetivu mak atu aumenta empregu hodi garante katak empregu hotu-hotu sei produtivu no dignu,” Xefe Ezekutivu argumenta.

Planu Rekuperasaun Ekonómika atu estimula investimentu sosiál públiku iha edukasaun, saúde, abitasaun no protesaun sosiál inklui promove setór no área sira ne’ebé kontribui ba kreximentu ekonómiku, ne’ebé totál kustu ba programa ne’e engloba iha OJE 2021 hamutuk millaun $124.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here