Diskusaun proposta OJE 2021 loron dahuluk iha faze jeneralidade iha sala plenária, Parlamentu Nasionál, segunda (30/11). Imajen TATOLI/Egas Cristovão

DILI, 30 novembru 2020 (TATOLI)–Tuir pilár haat Planu Estratéjiku Dezenvolvimentu tinan 2011 to’o 2030, sei prevee millaun $541 iha proposta Orsamentu Jerál Estadu (OJE) 2021 atu reforsa kapitál sosiál.

Primeiru-Ministru (PM), Taur Matan Ruak, hateten rekuperasaun sei alkansadu ho pakote rekuperasaun ekonómika abranjente ida, ne’ebé inklui investimentu boot iha área infraestrutura, espansaun protesaun sosiál ba família vulnerável liu no investimentu boot sira iha agrikultura, manufatura no turizmu atu alkansa produtividade boot liután.

“Resposta konsiderável kuaze millaun 124, nune’e ita bele evita krize ekonómika katastrófika ida no filafali ba kreximentu ekonómiku ne’ebé forte liu,” PM Taur hateten liuhosi diskursu iha loron dahuluk ba Proposta OJE 2021, faze jeneralidade, iha sala plenária, Parlamentu Nasionál (PN), segunda ne’e.

Enkuantu, millaun $475 ba dezenvolvimentu infraestrutura, apoiu globál millaun $338 ba dezenvolvimentu ekonómiku, no millaun $470 atu konsolida kuadru institusionál.

Xefe Governu konsidera, Timor-Leste tenke hametin ninia polítika ekonómika no orsamentál hasoru vulnerabilidade no problema estruturál boot sira ne’ebé antes  iha nanis ona.

“Karakterístika hanesan nível rendimentu kiik, ho aumentu simples iha dezenvolvimentu umanu no atrazu iha despeza Governu tanba restrisaun orsamentál durante tinan 2020 hatudu katak país ne’e presiza nível despeza ne’ebé krítiku no ideál, ne’ebé bele iha impaktu pozitivu ba estabilidade makroekonómika inklui oportunidade ekonómika no posibilidade produsaun iha ekonomia,” Xefe Ezekutivu subliña.

Orsamentu ne’e buka atu taka lakuna, ne’ebé bele haburas setór agrikultura, saúde, edukasaun, turizmu, petróleu no produsaun, inklui halo investimentu atu haluan protesaun sosiál no mós hadi’a perspetiva edukasionál no rezultadu saúde jerasaun daudaun ne’e.

Tulun setór privadu atu kria empregu signifikativu no dignu, sei promove liután setór xave balun hanesan esportasaun kafé ho kualidade a’as, prosesamentu produtu agríkola, peska, turizmu no konstrusaun, tanba ho investimentu hirak ne’e, sei promove komérsiu no investimentu diretu rai-li’ur nian, no iha tempu hanesan hadi’a signifikativamente klima negósiu.

Aleinde ne’e, Governu hakarak hametin reziliénsia populasaun liuhosi rede seguransa sosiál ne’ebé forte, jestaun dezastre, sistema nasionál saúde ne’ebé forte liu ho investimentu boot liu iha saúde primária, infraestrutura saúde públika no jestaun ambientál ne’ebé di’ak liu.

“Pasa hosi dezenvolvimentu infraestrutura bázika, hanesan estrada, ba projetu infraestrutura estratéjika ne’ebé iha impaktu direta no loloos ba ekonomia no meiu subsisténsia ema nian. Ezemplu, bainhira ita atu instala kabu fibra ótika tasi-okos no dezenvolve parke industriál no moderniza ita-nia portu no aeroportu, ho hanoin atu garante presu ne’ebé kompetitivu liu no sirkulasaun sasán no ema,” nia akresenta.

Governu atu halo reforma funsionamentu hosi podér judisiál no hosi administrasaun públika, ho hanoin atu garante justisa, efisiénsia, inovasaun, transparénsia no relasaun kustu benefísiu iha buat hotu ne’ebé halo.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here