Atividade iha sala plenária Parlamentu Nasionál. Imajen TATOLI/António Gonçalves

DILI, 30 novembru 2020 (TATOLI)—Tuir kalendáriu iha segunda (30/11), VIII Governu Konstitusionál no Parlamentu Nasionál (PN) sei debate proposta Lei Orsamentu Jerál Estadu (OJE) 2021.

Kalendáriu ajendamentu deside ona liuhosi reuniaun líder bankada atu hahú diskusaun lei orsamentál ne’e, hahú debate iha tuku 15:00 no termina iha 15 dezembru. 

Entretantu, audiénsia ba proposta ne’e termina ona iha loron 17 novembru no komisaun sira finaliza ona mós elaborasaun relatóriu hodi tama ba faze debate jeneralidade, espesialidade no halo votasaun iha finál globál.

Tuir Rejimentu Parlamentu Nasionál  (RPN) iha artigu 105 (inísiu diskusaun) alínea 1 hateten diskusaun iha jeneralidade foka ba prinsípiu no sistema projetu ka proprosta-lei idaidak nian. 

Nune’e, RPN artigu 106 (prazu mínimu molok debate iha jeneralidade) hatutan, proposta-lei labele debate iha jeneralidade molok liu prazu loron hitu, sura hahú hosi data admisaun. 

Proposta OJE 2021 hamutuk biliaun $1.895 kompostu hosi saláriu no vensimentu millaun $ 239,26, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

OJE 2021, VIII Governu Konstitusionál fó perioridade nasionál  lima ne’ebé aliña ba livru mean ne’ebé quia prosesu elaborasaun OJE 2021 hanesan setór kapitál sosiál, dezenvolvimentu ekonómiku ne’ebé aliña mós atividade rekuperasaun ekonómiku, infraestutura bázika no konetividade sira, dezenvolvimentu ambientál no reforma instutusionál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here