Diretóra Jerál Prestasaun Saúde, Ministériu Saúde (MS), Odete Viegas da Silva. Imajen/Hortencio Sanches

DILI, 30 novembru 2020 (TATOLI)—Ministériu Saúde, ohin, distribui ona ekipamentu atu apoiu programa lidun promosaun saúde liliu prevensaun pandemia globál COVID-19 no saúde én jerál ba Servisu Saúde Munisípiu Dili, Baucau, Lautem, Liquiça, Manatuto, Manufahi no Rejiaun Administrativa Espesiál Oe-Cusse Ambeno (RAEOA).

Diretora Jerál Prestasaun Saúde, Odete da Silva Viegas, maka diretamente entrega ekipamentu promosaun saúde no prevensaun coronavirus hanesan televizaun, screening, projetór, komputadór, printér, toa ho kuantidade purvolta unidade 100 ba Diretór Servisu Saúde Munisípiu neen inklui RAEOA.

Notísia Relevante :Japaun Apoiu Millaun $ 4.6 ba Governu Prevene COVID-19

Fasilidades hirak ne’e hetan apoiu husi Governu Japaun ne’ebé sosa ho osan purvolta rihun $120-resin, ho objetivu atu desimina informasaun ba komunidade kona-ba prevensaun COVID-19 no saúde públiku iha Timor-Leste.

”Governu Japaun apoiu ekipamentu ho montante orsamentu rihun $120 ho ekipamentu sira ne’ebé mak fó hanesan  televizaun, screening, projetór, komputadór, printer, no mós toa para fasilita Ministériu Saúde atu fahe ba Munisípiu hitu tanba Munisípiu sira seluk durante ne’e hetan hotu ona,” dehan Eis Diretora Jerál Ospitál Nasionál Guido Valadares (HNGV-sigla portugés), Odete ba jornalista sira iha Sentru Saúde Formoza Dili, segunda ne’e.

Ekipamentu hirak ne’e tenke uza ba servisu Ministériu Saúde nian, tanba ne’e, nia husu ba profisionál saúde sira atu utiliza duni ba programa promosaun saúde no prevensaun moras globál COVID-19.

“Aleinde COVID-19, bele uza ba programa imunizasaun,  nutrisaun, saúde materna infantíl  ida ne’e ita nafatin fó ba ita-nia komunidade sira  atu hakbesik nafatin fasilidade saúde liliu labarik sira ne’ebé  mak foin moris tenke hetan imunizasaun kompletu no mós inan isin-rua nafatin  mai fasilidade saúde para konsulta to’o partu,” nia hateten.

Notísia Relevante :MS husu Servisu Saude Covalima kontinua halo promosaun saúde

Jornalista :Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here