Kondekoradu Cesário da Costa "Malcom". Imajen TATOLI/Osória Marques.

LIQUIÇA, 30 novembru 2020 (TATOLI)–Hafoin Prezidente Repúblika, Francisco Guetrres ‘Lú Olo’, atribui kondekorasaun Ordén Timor-Leste ba sidadadun nasional hamutuk na’in-39 iha serimonia komemorasaun loron Prokalamasaun ba dala-45 iha Liquiça, Kondekoradu Cesário da Costa “Malcom” rekomenda ba Governu atu kria fatin espesiál ida iha munisípiu sira hotu, atu halibur luta-na’in sira-nia restu mortál. 

“Ha’u rekomenda, atu oinsá mak bele rekonese ami-nia komandante no líder sira ne’ebé luta ba funu hodi ukun rasik-aan, maibé daudaun ne’e sira la hamutuk ho ita. Tanba mate-ruin iha munisípiu hotu-hotu rai to’o kaisaun balun aat hotu ona no troka fila ba fila mai maibé nunka tau atensaun ba kestaun ne’e,” Malcom hateten ba jornalista Agência TATOLI iha Munisípiu Liquiça, foin lalais ne’e.

Malcom hateten, Estadu Timor-Leste tau liu atensaun ba Jardin Erói Metinaro nian maibé nunka tau hanoin ida ba mate ruin iha munisípiu sira seluk, ne’ebé mak kaisaun sira fohuk hotu ona.

Ho kestaun ne’e, Malcom husu nafatin ba parte relevante atu prepara netik fatin seguru ida ba ema-ne’ebé mak mate ba rai ida-ne’e, nune’e nia família sira bele vizita no labele husik de’it iha osuáriu hodi troka de’it mak kaisaun.

“Nune’e, mak ita bele konta tuir nia istória no sai istória ba ita jerasaun foun,” nia hateten.

Aleinde ida-ne’e, nia dehan, saudozu Nicolau Lobato no Daitula nia mate ruin to’o agora seidauk hetan ne’e agora Estadu no Governu sé mak ba buka tuir ona.

“Ita la hatene, sé mak atu ba buka. Governu mak buka ka ami ninia soldadu sira mak ba buka nia mate ruin. Tanba ne’e, ha’u triste liu, tanba laiha ema ida temi komandante Daitula nia-naran to’o agora,” Malcom dehan.

Entretantu, nia dehan, ho Kolar Orden Timor-Leste ne’e, nia sente kontente tebes tanba Estadu bele rekonese sira-nia sakrifísiu durante luta ba ukun rasik-aan.

“Ha’u kontente tebes ho rekonesementu Estadu nian liuhosi ‘Kolar Orden Timor-Leste’. Maibé, iha parte seluk,  ha’u sente triste tanba kolega barak mak la hamutuk ho ami iha loron importante ida-ne’e,” Kondekoradu Malcom hateten.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here