DILI, 30 novembru 2020 (TATOLI) – Ekipa jigante Lalenok United FC sei bele mantein nia glória hanesan kampiaun jogu iha Tasa 12 Novembru, epoka ne’e, ka lae? Resposta hotu sei termina iha minutu 90 nia laran bainhira kontra ekipa Boavista FC Timor iha kuartu finál ne’ebé sei hala’o iha Estádiu Munisipál Dili, sábadu (5/12).
Notísia Relevante : Lalenok United FC “sempre na frente”
Iha jogu kuartu finál ne’e, sei termina entre Lalenok United FC ka Boavista FC Timor mak iha direitu liu atu ultrapasa ba finál tasa 12 Novembru 2020.
Ekipa matadór rua-ne’e iha ona istória midar no moruk hasoru-malu iha kampu tebe-bola nian iha kuartu finál kopa Federasaun Futeból Timor-Leste (FFTL) fulan hirak liubá, ne’ebé hakerek ona iha istória jogu Timor-Leste nian Lalenok halakon Boavista FC Timor.
Treinadór Lalenok United FC, Simón Elissetche hateten, nia ekipa sei hatudu jogu ne’ebé di’ak hodi manan Boavista FC Timor nune’e bele hakat ba finál.
“Ami foku oinsá bele manan Boavista FC Timor hodi hakat ba finál. Ami atu kampiaun ka la kampiaun manan tiha lai Boavista mak ita foin haree fali jogu finál nian,” Simón ba Agéncia Tatoli, ohin, iha kampu Lalenok United FC, Fatuhada, Dili.
Nia dehan, iha kuartu finál kopa FFTL Lalenok manan Boavista FC Timor, maibé tempu la hanesan no imposivel ona sira atu manan tan. Tanba ne’e sira tenke servisu maka’as hodi bele manan dala ida tan hasoru Boavista FC Timor.
“Ami haree Boavista sira joga di’ak. Jogadór mesak selesaun nasionál ho esperiénsia ne’ebé mak di’ak, sira-nia treinadór mós iha esperiénsia natoon. Sira bele manan ami bainhira ami halimar la servisu maka’as,” Simon hateten.
Hosi sorin seluk, Agência Tatoli tenta halo konfirmasaun ba preparasaun Boavista FC Timor nian, maibé sira-nia parte lakohi fó komentáriu hodi dehan de’it katak, to’o iha jogu mak foin bele determina, manan ka lakon.
Notísia Relevante : Boavista manan 3-0 ba Emanuel, Lalenok hein iha kuatru finál
Jornalista : Hortencio Sanchez
Editór : Francisco Simões
