Produtu Cesta Bázika. Imajen TATOLI/Antónia Gusmão.

DILI, 30 novembru 2020 (TATOLI)–Administradór postu administrativu Lacluta, munisípiu Viqueque, José Andrade dos Santos, hateten insidente abitante ida sunu produtu Cesta Bázika tanba ladún satisfeitu ho folin mina-te’in, ne’ebé litru lima ho presu $8.

Tuir ajenda, iha domingu (29/11), Governu liuhosi Ministériu Koordenadór Asuntu Ekonómiku (MKAE) lansa programa Cesta Bázika iha postu administrativu Lakluta, munisípiu Viqueque.

“Horisehik  ne’e suku rua maka atu simu, maibé  bainhira Ministru, Administradór no autoridade lokál postu atu hahú distribuisaun, derepente maluk ida ho gazolina aqua ki’ik iha lima, hakat tama mai fatin destribuisaun produtu Cesta Bázika hodi fakar mina rai iha sasán ne’ebé atu distribui no sunu,” Administradór postu ne’e haktuir ba Agência TATOLI, via telefónika, segunda ne’e.

Maski nune’e, tuir nia, momentu ne’e kedan Polísia ne’ebé partisipa iha seremónia halo kedan intervensaun no asegura suspeitu hodi lori ba Eskuadra Polísia Lacluta.

Administradór postu administrativu ne’e hatutan katak, asaun ne’ebé abitante ne’e halo tanba la simu ho folin mina ne’ebé  tau iha lista produtu ne’e rasik.

“Motivu nia halo asaun ne’e tanba haree presu ne’ebé taka iha banner Cesta Bázika, hatudu katak espesiál ba mina bimoli litru lima ho folin  $8, maibé sira halo komparasaun ho kios iha Lacluta ne’e ho presu $5, tanba ne’e nia lamenta,” nia akresenta.

Tuir autoridade ne’e, ohin segunda (30/11) Polísia lori ona suspeitu ba munisípiu Baucau.

José Andrade fundamenta, maski seremónia ne’e mosu insindente maibé la hamate entusiazmu komunidade iha Lacluta, ne’ebé kompostu hosi suku haat hanesan  Ahi,  Dilor,  Uma-tolu no Lalini hodi kontinua simu nesesidade Cesta Bázika.

“Agora  komunidade kuaze 9.000 seluk hosi suku haat simu nesesidade ne’e,” nia akresenta.

Iha loron 29 novembru fahe ba suku Ahi no Dilor, no tersa (01/12) suku seluk bele simu tan produtu.

“Ha’u haree komunidade kontente no laiha problema. Insidente horisehik (29/11/2020) ema ida maka komete, la’ós ema barak no agora nia tenke responsabiliza ninia aktu, maibé ha’u garantia komunidade Lacluta iha suku haat sei simu nesesidade produtu ho di’ak,” nia subliña.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here