Polísia Eskuadra Kristu Rei, Munisípiu Dili, detein suspeita MS ne’ebé taa nia espoza AP. Imajen PNTL/Dok

DILI, 30 novembru 2020 (TATOLI)- Vítima AP ne’ebé hetan taa hosi nia kaben suspeitu MS, hahú rekupera ninia kondisaun saúde iha Ospitál Nasionál Guido Valadares  (HNGV), Dili.

Notísia Relevante : TDD aplika prizaun preventiva ba arguidu taa nia espoza iha Hera

Segundu Komandante PNTL Munisípiu Dili, Superintendente Euclides Belo, dehan,  hafoin hala’o tiha tratamentu kuaze loron 10 liu, vítima komesa sadar, maibé parte investigadór seidauk bele rekolla informasaun, tanba tenke hein relatóriu hosi parte médiku-sira.

“Vítima, ita akompaña nafatin nia saúde komesa rekupera ona, no parte família foin lalais husu kooperasaun polísia nian hodi halo doasaun raan ajuda vítima, maibé ita hein nafatin konfirmasaun hosi parte médiku nian to’o nia rekupera saúde maka foin fó deklarasaun ba polísia,” Superintendente Euclides Belo hateten ba jornalista, ohin, iha Komandu PNTL, Caicoli, Dili.

Vítima AP hetan taa hosi nia kaben suspeita MS ne’ebé rezulta vítima nia matan kuana nakfera no liman fuan karuk kotu, no parte isin lolon sofre kanek grave.

Kazu Maus tratu ba konjuga no tentativa ne’e akontese iha kinta (19/11), tuku 15:25 Otl, iha vítima nia rezidénsia iha Aldeia Mota-Ki’ik, Suku Hera, Postu Administrativu ­Kristu Rei, Munisípiu Dili.

Daudaun ne’e vítima kontinua hala’o tratamentu saúde iha ospitál Dili akompaña hosi parte polísia no vítima nia inan-aman. Entretantu, suspeitu kumpre hela desizaun primeiru interrogatóriu Tribunál Distritál Dili iha  prizaun preventiva Becora, Dili.

 Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here