Primeiru-Ministru, Taur Matan Ruak, hamutuk ho membru Governu sira defende Proposta OJE 2021 iha debate faze jeneralidade, iha sala plenáriu. tersa (01/12). Imajen TATOLI/Egas Cristovão

DILI, 30 novembru 2020 (TATOLI)–Iha ámbitu luta kontra pandemia COVID-19, Governu konsidera presiza aumenta signifikativamente oferta bens públiku hanesan saúde no edukasaun hodi mellora sistema nasionál saúde ho kualidade.

“Pandemia COVID-19 hatudu ona katak importante tebes asesu ba sistema nasionál saúde ne’ebé iha kualidade, bele fornese kuidadu saúde no infraestrutura saúde públika ne’ebé abranje ba ita-nia populasaun nia nesesidade,” Primeiru Ministru (PM), Taur Matan Ruak, hateten iha ámbitu debate Proposta Orsamentu Jerál Estadu (OJE) 2021 loron dahuluk iha faze jeneralidade iha sala plenária, Parlamentu Nasionál (PN), segunda ne’e.

Nune’e, Governu prevee orsamentu ba setór saúde sa’e millaun $86, ne’ebé korresponde ba 4% OJE 2021.

Orsamentu ba setór saúde kompostu hosi investimentu kuidadu saúde primáriu maka boot liu hamutuk millaun $29,1, inklui investimentu iha postu saúde foun sira no gastu ba servisu públiku ne’ebé presta atu kontrola moras, saúde iha família, emerjénsia médika, servisu nutrisaun, apoia estratéjia vijilánsia epidemiolójika.

“Ita reforsa kuidadu saúde sekundária no tersiária ho millaun $19,6, ne’ebé inklui millaun $10,9 ba kuidadu ospitalár sira, millaun $7,2 ba servisu ambulatóriu no millaun $1,3 ba infraestrutura,” nia akresenta.

Aleinde ne’e, sei iha mós investimentu hamutuk millaun $11,4 ba Hospital Nacional Guido Valadares (HNGV) hodi kobre nesesidade ba saúde sekundária no tersiária.

Nune’e mós, apoiu globál ho valór millaun $10,7 ba Servisu Autónomu Medikamentu no Ekipamentu Médiku (SAMES) hodi tulun hametin no prepara kadeia fornesimentu médiku, jestaun farmaséutika no lojístika saúde atu prevene, deteta no trata moras.

Iha fundu infraestrutura, prevee millaun $4,8 atu konklui konstrusaun Ospitál Baucau no unidade UKI (Unidade Kuidadu Intensivu) no pediatria HNGV, apoia investimentu iha edukasaun hanesan komponente importante seluk ida husi Orsamentu Estadu nian.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here