Diskusaun proposta OJE 2021 iha sala plenária Parlamentu Nasionál. Imajen TATOLI/Egas Cristovão

DILI, 30 novembru 2020 (TATOLI)—Primeiru-Ministru (PM), Taur Matan Ruak, konsidera kustu investimentu petrolíferu iha kampu Greater Sunrise a’as maibé bele transforma ba setór viável no industrializada no bele kria valór akresentadu inklui garante independénsia enerjétika.

“Maski kustu investimentu a’as, hein katak projetu ne’e bele fó reseita adisionál líkida atu depozita iha fundu petrolífera besik biliaun $30. Iha perspetiva ne’e, investimentu petrolíferu la’ós hanesan obstákulu ba investimentu iha ema ka maibé sai nu’udar fasilitadór hosi dezenvolvimentu,” Xefe Estadu hateten iha diskusaun Proposta OJE 2021 loron dahuluk iha faze jeneralidade, iha sala plenária, Parlamentu Nasionál (PN), segunda ne’e.

 Tuir PM, biliaun $30 sei esensiál atu finansia dezenvolvimentu no transferénsia interjerasionál ne’ebé sei garante ba jerasaun oin mai.

 Tanba ne’e, Governu iha ona estratéjia atu esplora mina-matan foun sira iha kampu Greater Sunrise atu rikusoin mina-rai kontinua finansia konstrusaun nasaun.

“Ita-nia rikusoin mina-rai nian sei kontinua finansia konstrusaun nasaun no investimentu iha saúde, edukasaun no moris-di’ak povu. Rekursu hirak ne’e, ninia jestaun la’o di’ak to’o agora. Bainhira rekursu mina-rai iha Bayu-Undan hotu daudaun maka estratéjia maka esplora mina-matan foun iha Greater Sunrise,” nia akresenta.

Iha orsamentu 2021, aloka millaun $8,5 hosi fundu infraestrutura ba investimentu iha projetu Tasi Mane no millaun $71 ba Timor Gás no Petróleu, Empreza Públika (Timor GAP,EP), hodi kontribui ba jestaun ekursu mina-rai.

Iha tinan 2018, Estadu negosia ona fronteira marítima no tratadu ho Austrália, ne’ebé sei aumenta reseita hosi 50% to’o 70%, bainhira prosesamentu mina-rai halo iha Timor-Leste.

“Estimativa hosi ConocoPhillips, Shell no Osaka Gas prevee katak mina-matan hirak ne’e bele prodús reseita besik biliaun $50 no estimativa kustu investimentu ne’ebé presiza atu estabelese indústria mina-rai nian iha Tasi Mane maka besik biliaun $18,” nia hatutan

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here