Diskusaun proposta OJE 2021 iha sala plenária Parlamentu Nasionál. Imajen TATOLI/Egas Cristovão

DILI, 30 novembru 2020 (TATOLI)–Iha Orsamentu Jerál Estadu (OJE) 2021, VIII Governu Konstitusionál aloka orsamentu ba Fundu Infraestrutura atu fó prioridade hadi’a setór infraestrutura iha Timor-Leste.

“Infraestrutura públika maka baze hosi dezenvolvimentu sosiál no ekonómika tanba ne’e iha tinan 2011, ita estabelese Fundu Infraestrutura atu harii no mantein infraestrutura esensiál sira, ne’ebé inklui estrada no ponte, portu no aeroportu, eletrisidade, bee moos no saneamentu, fasilidade públika no setór estratéjiku seluk,” Primeiru Ministru (PM), Taur Matan Ruak, hateten liuhosi diskursu iha loron dahuluk ba Proposta OJE 2021, faze jeneralidade, iha sala plenária, Parlamentu Nasionál (PN), segunda ne’e.

Investimentu hirak ne’e, iha forma projetu plurianuál, ninia finansiamentu maihosi OJE inklui parseria públiku privada no empréstimu esternu.

Iha OJE 2021, Governu sei investe millaun $474 iha kapitál dezenvolvimentu, ne’ebé inklui millaun $340 hosi Fundu Infraestrutura.

Estudu hosi Banku Mundiál iha 2019, hatudu katak kuaze país sira ne’ebé iha hela faze dezenvolvimentu, iha média investe 4% husi ninia Produtu Internu Brutu (PIB) iha infraestrutura públika, maibé Timor-Leste infraestrutura hetan estragu maka’as iha funu no konflitu durante tinan barak.

Iha tinan oin, Fundu Infraestrutura sei investe besik 13% hosi PIB totál iha infraestrutura públika.

“Ita-nia programa Governu fó prioridade liu atu hadi’a governasaun setór infraestrutura nian. Tanba ita-nia investimentu iha kustu oportunidade ne’ebé klaru, tenke hili ho matenek hodi garante katak investimentu hirak ne’e fó retornu sosiál no finanseiru sira ne’ebé justifika rekursu boot ne’ebé ita aloka,” Xefe Governu afirma.

Nune’e, lider ezekutivu hatuir kontinua mantein projetu sira ho padraun transparénsia ne’ebé a’as, viabilidade, impaktu ambientál, prosedimentu akizisaun kompetitivu, garantia kualidade no valór osan.

“Durante tinan 2021, ita sei haree didi’ak filafali prosesu no instituisaun planeamentu sira, hodi garante katak ita-nia salvaguarda metin no efikáz,” nia akresenta.

Tinan 10, CAFI konklui projetu 988

Durante ninia operasaun iha tinan 10 nia laran, Konsellu Administrasaun Fundu Infraestrutura (CAFI, sigla portugés) konklui ona projetu 988, enkuantu projetu seluk ne’ebé la’o hela, foun, ka planeadu maka hamutuk 868.

Hahú kedas iha inísiu fundu ne’e, valór totál projetu sira hotu ne’ebé hetan ona aprovasaun maka biliaun $4,8 no ninia ezekusaun atinje ona biliaun $3,1, ne’ebé koreesponde 64%.

Durante implementasaun projetu hirak ne’e konsege  kria empregu ona 61.325.

Iha área eletrisidadade, iha orsamentu 2021, sei investe millaun $18 atu hametin sistema distribuisaun, liuliu liña no transformadór sira atu to’o ba sidadaun barak liután no mós sei gasta kuaze millaun $140,1, korresponde 7% husi orsamentu ba kombustível no manutensaun jeradór eletrisidade sira iha Hera no Betano.

Aleinde ne’e, Governu kontinua moderniza Aeroportu Internasionál Prezidente Nicolau Lobato, liuliu ninia pista hodi garante katak aeroportu ne’e bele kumpre regra seguransa no norma aviasaun sira seluk, no fornese naroman ba semo iha tempu-kalan.

Investimentu estimadu ne’ebé presiza millaun $483, ne’ebé finansia liuhosi kombinasaun hosi Orsamentu Estadu, empréstimu, parseria públiku privada no doadór sira.

Iha tinan 2021, Governu atribui millaun $16 hosi Fundu Infraestrutura atu selu ba sosa rai, kompensasaun sira no atividade inisiál sira seluk.

Negosiasaun no mobilizasaun empréstimu bele konklui ona iha tinan 2021, konstrusaun faze dahuluk hosi faze tolu bele hahú ona iha 2022 klaran no bele konklui to’o tinan 2024.

Enkuantu, Portu Tibarmaka projetu ho interese nasionál estratéjiku nian ne’ebé boot tebes, ho modalidade Parseria Públiku Privada (PPP) dahuluk ne’ebé implementa hela no konstrusaun hahú iha agostu 2018, ne’ebé ninia jestaun responsabiliza husi grupu Bolloré, detentór kontratu konsesaun durante tinan 30 hamutuk millaun $490.

“Hein katak, hafoin estensaun fulan 9 tanba COVID-19, konstrusaun ne’e bele ramata ona iha maiu tinan 2022,” Xefe Governu tenik.

Durante tinan 2021, sei konklui estudu preparasaun no viabilidade nian ba parke industriál ida, ne’ebé tuir planu sei harii iha munisípiu Liquiçá.

“Governu iha esperansa parke ne’e bele kria empregu 4.000 no promove tranzbordu, reembalajen no produsaun ne’ebé orientada ba esportasaun ne’ebé ligada ho Portu Tibar,” PM Taur hatutan.

Kona-ba Teknolojia Informasaun no Komunikasaun, iha tinan 2021 sei investe millaun $41 atu instala fiu tasi okos ba fibra ótika ne’ebé liga ba territóriu norte Austrália nian.

Governu aloka mós millaun $25 ba manutensaun, reabilitasaun no hadi’a infraestrutura, inklui millaun $6 ba estrada rurál sira iha programa Roads for Development (R4D) ka estrada ba dezenvolvimentu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here