Estudante mileniál hosi Eskola Sekundária Jerál Públika 4 Setembru Liceu Viqueque, Julito Miguel, prodús manual aviaun ida. Imajen TATOLI/Memensio Sequeira Freitas.

Laiha folin liu se ó-nia Intellgence Quitient (IQ) aas maibé baruk-teen, laiha dixiplina. Buat ne’ebé importante mak ó saudavél no hakarak sakrifika ba ó-nia futuru ne’ebé nabilan (BJ Habibie).

DILI, 29 novembru 2020 (TATOLI)—Liafuan inspirativu hosi Prezidente Indonézia ba datoluk, BJ Habibie, ne’e merese prega ba estudante milineiál hosi Eskola Sekundária Jerál Públika 4 Setembru Liceu Viqueque, Julito Miguel, ne’ebé uza ninia matenek no kreatividade  uza ninia IQ (Intellegence Qoutient), EQ (Emotional Qoutient), SQ (Spiritual Qoutiente), no TQ (Trancendental Qoutiente) hodi prodús mákina no prodús modelu aviaun Elikópteru ida be bele semo ba-mai.

Estudante mileniál, Julito Miguel, nu’udar oan mane dahuluk hosi maun-alin na’in-hitu (7) no oan hosi (família simples) aman António Miguel no inan Cristina Sarmento ne’e, uza ninia IQ iha atividade hanoin (kognitivu) ne’ebé ligadu ho kapasidade hanoin-hetan, komprende, halo analize, no rezolve problema ida. Atividade ne’e haberan ho Emotional Qoutiente=matenek emosionál (EQ) hodi uza kapasidade halo kontrolu ba ninia sentimentu, kuñese ema seluk nia sentimentu, adapatasaun, servisu hamutuk, dixiplina, no iha kompromisu atu realiza ninia mehi sai realidade.

Atu halo ninia mehi ne’e sai realidade no sai folin ba nasaun Timor-Leste iha loron aban, estudante mileniál ne’e utiliza ninia Spiritual Qoitien=Matenek Spirituál (SQ) ho kapasidade hodi hatudu hahalok ne’ebé onestu, justu, respeita, domin, toleransia, no haraik-aan, Signifika, nia iha kapasidade atu komprende no fó folin ba saida mak nia hasoru iha nia moris loro-loron. Atu halo ninia matenek ne’e sai realidade, nia uza mós Trancendental Quotiente=Matenek Transdentál (TQ) ho konseitu vizioniru dook ba oin ho pergunta; “Sé mak ha’u?; Ha’u hosi ne’ebé?; Ha’u sei ba ne’ebé bainhira ha’u mate?”

Hosi perguntas sasadik ida-ne’e mak sadik estudante miliniál hosi Eskola Sekundária Jerál Públika 4 Setembru Liceu Viqueque, Julito Miguel, esforsu-aan hodi bele prodús mákina oioin hanesan “Mákina Dulas Nuu”, “Mákina Behu Batar”, “Mákina Dulas Kafé”, “Mákina Ko’a Kripik Fehuk Europa-Señoura-Talas-Aifarina ka Hudi”. Aleinde prodús mákina sira-ne’e, estudante mileniál ne’e mós konsege prodús modelu aviaun Elikópteru ida-ne’ebé bele semo no aprezenta ona iha loron Mundiál Siénsia no Matemátika iha tinan 2018 iha Venilale (Baucau).

Elikópteru ne’ebé Julito Miguel prodús lihosi Liceu Science Group ne’e konsege sai tópiku favóritu ba tinan 2018 ne’ebé ninia baze foti hosi referénsia ba teoria “Enerjia Mekánika” nian no elikópteru ala Liceu Viqueque nian ne’e konsege semo iha lalehan.

 Diretór Eskola Sekundária Jerál Públika 4 Setembru Liceu Viqueque, Verissimo Marques, rekuñese katak ninia estudante Julito Miguel ne’e iha duni abilidade báziku ka iha talentu naturál atu prodús mákina oioin hodi kontribui ba Liceu Science Group hodi hamorin eskola nia naran iha nível nasionál.

“Labarik Julito Miguel ne’e, nia problema mak nia hanesan kbiit laek ida-nia oan. Entaun, ladún iha kbiit finanseira natoon atu finansia ninia nesesidade eskola nian. Tanba ne’e, dalaruma eskola mak tulun nia, tuir eskola nia beran atu bele tulun estudante refere,” Verissimo Marques hateten.

Iha parte seluk, profesór Helio Faria Guterres nu’udar akompañador ba Liceu Science Group (LSG) reforsa tan afirma katak estudante mileniál Julito Miguel nu’udar estudante potensiál ida iha eskola no iha Liceu Science Group (LSG) laran. “Ami orgullu ho nia tanba nia kontribui makaas loos ba dezenvolvimentu Liceu Science Group ida-ne’e,” Helio Faria Guterres haktuir.

Atu hatene kle’an liu kona ba kreatividade saida mak Julito Miguel halo ona iha nia uma no nia eskola, tuir mai Kontribuidór Agência TATOLI iha Ossú-Viqueque, Memensio Sequeira Freitas, hala’o entrevista ho estudante mileniál, Julito Miguel, iha Eskola Sekundária Jerál Públika 4 Setembru Liceu Viqueque, sesta ( 27 novembru 2020) ne’e.

Dezde horbainhira mak ita-boot hanoin atu envolve aan iha kreatividade sira hanesan ne’e no saida de’it mak ita-boot prodús ona durante ne’e?

Dezde ha’u sei iha idade tinan 14 (5o Ano EBC), ha’u hahú ona ho kreatividade sira hanesan halo kareta kiik-oan ba halimar, motor, aviaun simples ruma no mákina simples ruma. No, bainhira ha’u tuur ona iha eskola primária (5o Ano), ha’u komesa intensiva liután prodús mákina oioin. Neste momentu, bainhira ha’u iha ona eskola sekundária, ha’u konsege halo ka rakit mesak mákina sira hanesan Mákina Dulas Nuu, “Mákina Behu Batar”, Mákina Ko’a kripik (fehuk ropa, señoura, ai-farina ka bele mós hudi), no Mákina Dulas Kafé.

Agora daudaun mós ha’u iha hela preparasaun atu halo motór uza mákina sensor nian. Ba motór ne’ebé ha’u sei prodús hosi mákina sensor nian, ninia dezeñu prontu hotu ona. Maibé, tanba ha’u laiha kapasidade finanseira ne’ebé di’ak entaun sei haree oinsá mak ha’u bele hahu prodúz motór refere.

Durante halo sasán sira-ne’e, ita-boot uza materiál saida de’it no materiál sira-ne’e hetan hosi ne’ebé?

Kreatividade hodi halo sasán hirak ne’e, ha’u esplora rasik hosi ha’u-nia kakutak no karik ida ne’e sai hanesan talentu naturál ida mai ha’u. Nu’udar kbiit laek nia oan ida, ha’u foin koñese no utiliza telefone ANDROID bainhira tuur ona iha 12o Ano ensinu sekundária nian. Entaun, mákina sira-ne’e ha’u halo tuir ha’u-nia imajinasaun no inventa de tal forma hodi nia sai duni hanesan buat ne’ebé ha’u hakarak.

Tanba ne’e, ha’u bele dehan katak kapasidade hirak ne’e hanesan dón ida ke ha’u hetan naturalmente hosi Na’i Maromak. Tanba, bainhira ha’u iha 5o Ano eskola primária, ha’u seidauk hatene saida mak internete. Ho interese ne’ebé mai hosi ha’u rasik, se ha’u hakarak halo karik kareta oan ruma, ha’u presiza kalkula tuir ninia velosidade no mós tempu hira mak nia presiza no distánsia hira mak nia sei liu. Entaun, hafoin kalkula tiha kestaun sira-ne’e hotu mak ha’u foin monta kareta tuir kalkulasaun ne’ebe iha.

Ita-Boot aprende talentu sira-ne’e hosi ema ruma ka talentu sira-ne’e simu hanesan talentu erdada ruma tanba iha ansestral balu mak iha talentu hanesan?

Talentu hirak ne’e, ha’u lahetan hosi ema seluk. Basá, ha’u-nia aman ka inan nunka iha kreatividade no kapasidade hodi prodús sasán ruma relasiona ho artezenatu. Ha’u-nia avó mane ida, mak uluk liu konsege halo kilat ne’ebé uza ai-kose no fatuk mean hodi tiru (kilat rakitan). Maibé, tanba altura ne’ebá malae-mutin prende tiha kilat ne’ebé ha’u-nia avó halo, entaun nia mós la konsege kontinua to’o nia mate. Ha’u bele dehan, ha’u-nia talentu ne’e hanesan talentu naturál ida ke moris nanis iha ha’u nia aan.

Ita-Boot prodús mákina hirak ne’e, iha ne’ebé de’it? Iha uma ka iha eskola?

Mákina hirak ne’e barak liu ami prodús iha ami nia eskola (ESG. 4 de setembru Vikeke). Tanba ha’u mós nu’udar membru ida hosi Liceu Science Group no nune’e eskola promove ami entaun ami prodús mákina hirak ne’e iha eskola no halo mós espozisaun iha ami-nia eskola hodi ema seluk bele haree. Aleinde ne’e, liuhosi selebrasaun Loron Mundiál Siénsia no Matemátika ne’ebé Komisaun Nasionál Timor-Leste ba UNESCO liu hosi nia divizaun SESIM halo kada tinan, ami konsege ba aprezenta ami-nia kreatividade hirak ne’e iha eventu sira refere.

Ba oin, sa’ida mak alin sei halo kuandu akaba alin nia estudu iha ensinu sekundáriu?

Bainhira ha’u akaba ha’u-nia estudu iha Liceu, se ha’u kontinua karik ha’u-nia estudu mak ha’u sei dezenvolve di’ak liután iha nível ensinu superiór. Maibé, se ha’u-nia kbiit finanseira la sufisiente karik atu kontinua, entaun sei buka atu kontinua prodús mákina sira iha ha’u-nia uma no sei hatudu ka halo espozisaun iha munisípiu bainhira komemora loron nasionál sira hanesan 20 de maiu, 28 de novembru no loron sira seluk tan.

Ha’u rona katak aleinde prodús mákina hirak ne’e, ita-boot mós prodús ona aviaun ida ne’ebé bele semo. Ita-Boot bele konta uitoan kona-ba ida ne’e?

Aleinde mákina sira-ne’e, ha’u mós konsege rakit aviaun ida no ha’u hatudu tiha ona liu hosi World Science Day iha Venilale iha tinan 2018 liubá. Aviaun ne’e, bainhira ha’u START (halo moris) tiha, nia semo kedas. Soké, nia labele para iha fatin ne’ebé ha’u hakarak atu nia para. Nune’e, bainhira fila hosi Venilale iha momentu ne’ebá (2018), ha’u komesa estuda hosi mídia oioin, hosi referénsia oioin no liuhosi estuda durante kuaze fulan tolu (3) nia laran kona-ba remote control. Entaun, ha’u konsege hetan duni rezultadu maibé aviaun refere seidauk konsege para iha ninia pozisaun ne’ebé ita hakarak nia tenke para iha fatin ne’e.

Estudante milineiál hosi Eskola Sekundária Jerál Públika 4 Setembru Liceu Viqueque, Julito Miguel, prodús Mákina Ko’a Kripik no Mákina Dulas Kafé. Imajen TATOLI/Memensio Sequeira Freitas.

Sasan hirak ne’e, ha’u instala liuhosi utiliza fali sasán simples sira, sasan uzadu sira hanesan dinamo hodi liga ho pilla tuir kapasidade hosi dinamo ne’e rasik. Se dinamo ho kapasidade boot mak ha’u uza mós pilla sira ne’ebé ninia voltajen hanesan ho dinamo refere. Purtantu, mákina ka aviaun sira be ha’u instala ona ne’e, utiliza de’it sasán restu sira ne’ebé ha’u bele hetan fasilmente iha fatin-fatin sein gasta bintés (osan) ida atu hola materiál sira.

Entretantu, bainhira ami halo karik iha eskola mak eskola ajuda ami ho osan uitoan atu aranja sasán sira-ne’ebé presiza osan atu ami bele halo prátika hodi kontinua promove siénsia no teknolojia iha ami-nia eskola. Ne’eduni, dala ruma ha’u halo sasán sira-ne’e iha eskola (bainhira iha tempu prátika ba atividade Liceu Science Group) ou halo mós iha uma bainhira ha’u sai ona hosi eskola.

Oinsá mak ita-boot bele utiliza tempu ho di’ak ba estuda no ba prodús obra hirak ne’e?

Atu ha’u la lakon ha’u-nia tempu ba estuda no prodús mákina hirak ne’e, autonomiamente ha’u halo mós oráriu ba ha’u-nia aan. Oráriu ida-ne’e nia objetivu mak atu regulariza ha’u-nia tempu atu iha tempu estuda ha’u estuda. Se to’o tempu ha’u tenke halo mákina karik, ha’u halo mak mákina. Aleinde ne’e, ha’u mós utiliza ha’u-nia tempu ba halimar bola ka buat seluk tan. Aleinde estuda no rakit sasán, ha’u mós dala ruma fa’an “pisang goreng” no “es ka karmelu” atu bele hetan netik osan ruma hodi finansia ha’u-nia nesesidade eskola nian sira. Rezultadu hosi fa’an “pisang goreng” ho “es ka karmelu” ne’e mak ha’u konsege hola mós bixikleta ida-ne’e, hodi fasilita ha’u-nia viajen hosi uma ba eskola no hosi eskola ba uma.

Ita-Boot nia espetativa ba oin ne’e halo nusa?

Ha’u-nia espetativa ba oin, karik mak ha’u-nia naran sai (liu selesaun ba UNTL ka IPB) mak ha’u sei kontinua ha’u-nia estudu iha ensinu superiór. Se liu selesaun ba Departamentu Enjeñaria ne’e di’ak liután atu ha’u bele dezenvolve talentu naturál ne’ebé ha’u iha ona. Mak la liu selesaun karik, ha’u sei la kontinua ha’u-nia estudu tanba ha’u no ha’u-nia família laiha kbiit finanseiru natoon atu ha’u bele kontinua iha ensinu superiór privadu sira iha Dili laran. Karik ha’u la kontinua ha’u-nia estudu mak ha’u sei foku hodi halo mákina atu nia bele sai di’ak liután. Ha’u husu nafatin ba ha’u-nia alin sira iha Liceu atu kontinua tan obra ne’ebé ita halo hamutuk ona iha eskola.

Saida mak ita-boot hanoin kona-ba dezenvolvimentu siénsia no matemátika iha ita-nia rain Timor-Leste?

Kona-ba dezenvolvimentu siénsia no matemátika iha ita-nia rain, ha’u hanoin ita presiza kontinua beibeik saida mak Komisaun Nasionál Timór Leste ba UNESCO (KNTLU) liu hosi nia divizaun SESIM (Sentru Estudu Siénsia no Matemátika) halo ona hodi kontinua promove siénsia no matemátika ba oin ba timoroan tomak. Tanba só liuhosi maneira sira hanesan ne’e de’it mak sei hamosu estudante inovativa sira atu la depende de’it ba profesór no livru maibé komesa ona esplora matenek ne’ebé sira iha atu hamosu buat foun ruma.

Estudante milineiál hosi Eskola Sekundária Jerál Públika 4 Setembru Liceu Viqueque, Julito Miguel, prodús Mákina Ko’a Kripik no Mákina Dulas Kafé. Imajen TATOLI/Memensio Sequeira Freitas.

Ha’u-nia hanoin mós atu dezenvolve siénsia no matemátika mak oinsá ita avansa di’ak liután atu komesa hanoin prodúz ona mákina própria ita-nian atu bele utiliza iha ita-nia rain. Pur ezemplu, iha Ermera, ita iha produsaun kafé orijinál ne’ebé di’ak loos. Nusá mak ita la hanoin ona atu prodúz mákina produtu Timór nian rasik atu la dependente ba rai seluk. Ka ita bele prodús mákina sira ne’ebé ko’a kripik atu ita hapara ona importasaun “KU SUKA” hosi Indonézia (rai-li’ur).

Ne’eduni, ho mákina simples no manuál ne’ebé ha’u hamutuk ho maluk estudante sira halo ona ne’e, halo nusa mak ita-nia enjiñaria sira bele hanoin ona atu inventa ka prodús mákina otomátiku ita-nia rasik hodi bele uza iha ita-nia rai doben Timor-Leste. Só ho nune’e de’it mak ita bele fó sentidu loloos ba dezenvolvimentu siénsia no matemátika iha ita-nia rain.

Tanba ne’e mak ha’u iha mehi aas liu atu tama iha Enjeñaria Mekánika atu nune’e ha’u bele dezenvolve liu tan talentu ida-ne’e. Ha’u fiar katak timoroan sira bele atu prodús rasik ninia mákina liuhosi siénsia no teknolojia oioin ne’ebé ita estuda daudaun ne’e.

Iha mensajen ruma ba ita-boot nia maluk estudante sira no juventude sira iha Timor-Leste?

Ha’u-nia mensajen ba ha’u-nia maluk joven no estudante sira atu keta haluha estuda no aprende rona ema ne’ebé boot liu ita, ho esperiénsia oioin atu ita bele aprende buat ruma hosi sira. Ita mós presiza respeita ema ne’ebé idade boot liu ita, hanesan ita-nia inan-aman no profesór sira. Ita la divia kontra sira maibé oinsá mak ita bele aprende buat di’ak ruma hosi sira. Tanba profisaun seluk bele mosu bainhira ita iha profesór sira. Ita-nia obrigasaun mak estuda no kontinua estuda. Basá, liu de’it hosi estuda mak ita sei bele deskobre no koñese buat oioin.

Ha’u-nia mensajen ba Ministériu Edukasaun Juventude no Desportu (MEJD), ha’u hato’o de’it atu tau matan ba ami-nia kreatividade sira hanesan ne’e. Suporta ami ho finanseira ruma atu ami bele dezenvolve di’ak liután. Ha’u husu ba MEJD, atu bele tau matan ba ami-nia estudu atu loron ruma ami bele kontribui buat di’ak ruma ba dezenvolvimentu ita-nia rain Timor-Leste nian.

***

Luku ba estudante mileniál ida-ne’e ninia kreatividade no ninia resposta ba pergunta hirak ne’e, liafuan sira-ne’e reprezenta kedas Prezidente Indonézia ba datoluk, BJ Habibie, ninia liafuan inspirativu ne’ebé hateten; “Bainhira tempu joven ita prenxe ho baruk-teen, mak to’o katuas mós sei baruk-teen hafoin nunka sente aban atu mate, maibé se ita aprende no halo analize barak mak bainhira ita sai katuas, ita manan”, no “Moris bá hanesan ó atu mate aban no haksolok bá hanesan ó atu moris nafatin ba nafatin”.

Kontribuidór: Memensio Sequeira Freitas

Editór: Cancio Ximenes

PUBLISIDADEiklan

5 KOMENTÁRIU

  1. Parabens ba intelincia no creativo, nafatin luta ba oin krk bl futuru sai nabin ba o Nia an nms ba Nasaun Timor Leste, parabens

  2. Parabens no dejezu susesu nian ba alin oan ne’e. Ba Governu, keta haluha atu tau-matan ba fini di’ak hanesan ne’e. Se bele fo bolsa ba nia hodi ba estuda iha nasaun sira hanesan japaun.

  3. Parabens, matenek no creativo, orguilho tebes,
    hanoin ida ba ema boot guvernu sira, karik bele ita bot sira bele fo bolsu estudu ba nia hodi kursu iha LELI no haruka nia ba estudu iha Jerman. loron ida nia sei ha morin Timor Leste nia naran, “Feelings” komentariu baseia ba esperiensia alin oan ne’e nian. esperanca.

  4. parabens, alin ne’e mak hanesan riku soin timor leste nian, estadu presiza tau matan ba nia no buka dalan oinsa bele suporta nia estudu ba oin, se estadu rekuinhese tiha mak la dezemvolve nia mak estadu sei lakon.
    husu ba governu atu tau matan ba alin neeee.
    husu ba alin ne’e para dezemvolve nafatin nia matenek ne’ebe iha.
    parabens, parabens, parabens no parabens.

Leave a Reply to Cipriano Manuel Das Neves Cancel reply

Please enter your comment!
Please enter your name here