Ekipa BNCTL FC. Imajen TATOLI/Domingos Piedade Freitas.

DILI, 29 novembru 2020 (TATOLI)—Jogu finál entre ekipa maskulinu BNCTL kontra ekipa Sekretáriu Estadu Kooperativa (SECoop-sigla Portugeza) ne’ebé ohin realiza iha Kampu Futebol Salaun (Futsal) Bebora, Dili,  lori ekipa futebol mane hosi BNCTL sai kampiaun ba tasa Ministériu Assuntus Parlamentares no Komunikasaun Social (MAPCOMS) ba tinan 2020 ho score 4-3.

Iha primeira jogu entre ekipa maskulinu SECoop no Banku Nacional Comércio Timor Leste (BNCTL), hahú jogu ho rítmu ne’ebé mak neineik maibé ekipa rua halo kontra atake makaas ho ida-idak ninia estratejia atu hatama golu ba ida-idak nia baliza, ne’ebé ekipa BNCTL nia guarda rede mak José Araújo (87) no guarda rede hosi SEcoop mak Avelino Barreto (8).

Iha jogu primeira parte ne’e, ho rítmi jogu ne’ebé neineik maibé lais lori kapitaun BNCTL, Zaquiel Pinto, la kleur de’it konsege halo guarda rede SECoop, Avelino Barreto, nia matanfuan halai sala, hodi hatama golu iha minutu 10.

Maibé sorte kala haliis ba ekipa SECoop, bainhira liu de’it minutu tolu no monu iha minutu 13, estrela jogadór hosi SECoop, Geovanio Belo (92), konsege hatama golu ho ulun ne’ebé pasa hosi guarda rede. Nune’e, iha jogu primeira parte ne’e ramata ho score provizóriu 2-1.

Tama ba segunda parte, foin la’o minutu balu, iha minutu 17, estrela jogadór Joăo Pedro (77) hosi SECoop konsege xuta bola makaas no halo rede nakles hodi muda score 2-2. Maibé ho golu ida-ne’e, sadik ekipa maskulina BNCTL kontinua halo esforsu, nune’e iha minutu 18 no 19, kapitaun BNCTL konsege hatama golu rua tutuir.

Iha minutu 19, jogadór SECoop Henrique de Carvalho (15) mós lansa golu ida, nune’e score muda-aan ba 4-3. Maibé tanba jogu manas demais, to’o ikus to’o iha minutu 20, kapitaun BNCTL hetan kartaun mean, nune’e jogu iha segunda parte mós termina ho score 4-3.

Ho nune’e, ekipa SECoop ne’ebé okupa segundu lugar, manan prémiu ho osan $600 no ekipa BNCTL ne’ebé mak sai kampiaun iha taxa MAPCOMS ne’e, manan osan ho monatante $800 no hetan medalla.

Jornalista: Domingos Piedade Freitas

Editór: Cancio Ximenes

HAKEREK NO HATÁN

Please enter your comment!
Please enter your name here