Presidenti da Republika Francisco Guterres Lu Olo ho nia espouza foto hamutuk ho estundantes sira wainhira partisipa iha selebrasaun loron Mundial labarik nian iha Palacio Presidenti Aitarak Laran, Dili 1 Juinu 2017.Foto TATOLI/Antonio G

AINARU, 29 novembru 2020 (TATOLI)–Banku Sentrál Timor-Leste (BCTL, sigla portugés) liuhosi programa poupansa ka edukasaun finanseira rejista ona labarik iha territóriu Timor-Leste hamutuk rihun 23 mak rai osan iha konta “Ha’u nia Futuru” hamutuk ona millaun $7.

Governadór BCTL, Abrãao Vasconselhos, fó sai dadus ne’e iha selebrasaun loron nasionál poupansa ba daneen (6) ne’ebé mak mak akontese iha loron 29 novembru.

“Hakarak informa katak to’o iha fulan-novembru 2020 totál labarik hotu-hotu ne’ebé mak iha konta ‘Ha’u nia Futuru’ kuaze millaun $7, hosi labarik kuaze rihun 23. Montante ida karik laboot ida, hanoin dehan montante sei ki’ik o’an maibé ida-ne’e atu hakarak hatudu de’it katak iha vontade boot hosi inan-aman sira para atu prepara labarik sira nian”, Governadór BCTL, Abrãao Vasconselhos, informa iha selebrasaun loron nasionál poupansa ba daneen nune’e mós lansamentu ofisiál ba programa Kampu Dijitál ne’ebé mak hala’o iha Prasa Postu Administrativa Maubisse, Munisípiu Ainaru, domingu ne’e.

Governadór BCTL ne’e dehan, programa poupansa ou programa edukasaun finanseira ne’e eis Prezidente Repúblika, atual Primeiru-Ministru, Taur Matan Ruak, lansa iha tinan 2014 ne’ebé 29 novembru kada tinan komemora hanesan loron nasionál poupansa.

Banku sentrál hala’o programa edukasaun finanseira liuliu iha ensinu báziku iha territóriu Timór laran tomak iha alunus liu rihun 25 mak partisipa iha programa edukasaun finanseira BCTL nian.

“Ida-ne’e kobre territóriu tomak, banku sentrál iha serbisu ne’ebé mak di’ak tebe-tebes ho Ministériu Edukasaun, Juventude no Desportu atu implementa nasionál ba edukasaun finanseira. Iha 2014 mós BCTL lansa produtu poupansa ida ba ita-nia oan sira-ne’ebé mak hosi foin moris to’o tinan 17,” nia esplika.

Responsável ne’e subliña, produtu poupansa ida bolu dehan ‘Ha’u Nia Futuru’ ne’e, ba de’it labarik sira. Inan-aman sira, nia dehan, bele ajuda loke konta bankária ba ninia oan sira no loke tiha konta ne’e tau osan iha ne’ebá, bainhira labarik sira to’o tinan 17 osan sira iha konta ne’e labarik sira-nian.

Notísia Relevante: BCTL ofisializa programa kampu dijitál iha Maubisse

Jornalista: Antónia Gusmão

Editór: Cancio Ximenes

HAKEREK NO HATÁN

Please enter your comment!
Please enter your name here